ԲԴԽ-ն շարունակում է աշխատանքը՝ էլեկտրոնային մակագրման համակարգի ամբողջական շահագործումն օր առաջ ապահովելու համար

Այսօր՝ ապրիլի 4-ին, Բարձրագույն դատական խորհրդի նախագահի պաշտոնակատար Գ. Ջհանգիրյանը և ԲԴԽ անդամները Խորհրդի շենքում հանդիպել են «Մեյսիս ինֆորմեյշն սիսթեմս» ՍՊԸ-ի տնօրեն Արմեն Մանուկյանի հետ: Այս մասին հայտնում են Բարձրագույն դատական խորհրդից:

Հանդիպման ընթացքում քննարկվել է էլեկտրոնային մակագրման համակարգի վերագործարկմանն ուղղված նախապատրաստական աշխատանքների ընթացքը:

Չնայած մինչ օրս Դատական դեպարտամենտն այդպես էլ չի ստացել էլեկտրոնային մակագրման համակարգի գործարկման և շահագործման բանալիները և չունի ֆիզիկական հասանելիություն սերվերային համակարգին, ի նկատի ունենալով ՀՀ դատախազության տեղեկացումը քրեական գործով ծրագրի շահագործման խոչընդոտների բացակայության մասին, «Դատական համակարգ» համակարգչային ծրագրի հեղինակ և սպասարկումն ապահովող կազմակերպության և Դատական դեպարտամենտի մասնագետների կողմից ամենօրյա ռեժիմով շարունակվում են աշխատանքները՝ համակարգի ամբողջական շահագործումն օր առաջ ապահովելու համար:

ԲԴԽ մեկ դատավոր և մեկ գիտնական անդամ Խորհրդի կողմից լիազորվել են իրենց անմիջական հսկողության տակ պահել վերը նշված աշխատանքների ընթացքը:

Հիշեցնենք, որ Դատական գործերի ավտոմատ մակագրման համակարգը չի գործում արդեն շուրջ 8 ամիս․ օրեր առաջ տարածված տեղեկատվությունը դատաիրավական ոլորտի մասնագետների մոտ հույս արթնացրեց, որ վերագործարկումը մոտ է։ Մարտի 17-ին գլխավոր դատախազի խորհրդական Գոռ Աբրահամյանը հայտարարեց, որ համակարգի առգրավված «բանալիները» վերադարձվել են դատական դեպարտամենտին։

Նշենք նաև, որ խոսքը, որպես այդպիսին, ոչ թե ֆիզիկական իմաստով բանալու, այլ շահագործման թույլտվության մասին է։