«Կարեն Կարապետյանը խամաճիկ է, սրա հետևում կանգնած է Սամվել Կարապետյանը, ժողովուրդը պետք է իմանա, թե ով է իր դեմ դուրս եկել՝ հանուն իր կապիտալի»․ Հայկ Մարտիրոսյան

Չնայած Սերժ Սարգսյանը հրաժարական տվեց, սակայն Հանրապետականը, կարծես, չի պատրաստվում իշխանությունը զիջել, Դուք ինչպե՞ս եք պատկերացնում իրադարձությունների հետագա ընթացքը. քաղաքագիտության դոկտոր Հայկ Մարտիրոսյանին հարց ուղղեց Factor.am-ը:

«Սա ապշեցուցիչ, սարսափելի սցենար է: Այն, ինչ տեղի է ունենում, ուղղակի անհավանականության ոլորտից է, և որևէ մեկը ընդհանրապես չէր կարող կարծել, որ այսպես կկայանա: Կարեն Կարապետյանը ընդհանրապես խամաճիկ է, գործիքի դեր է կատարում և դուրս է եկել իր ժողովրդի դեմ: Սրա հետևում, վստահաբար, կանգնած է Սամվել Կարապետյանը՝ «Տաշիր գրուպի», և ժողովուրդը պետք է իմանա, թե ով է իր դեմ դուրս եկել՝ հանուն իր կապիտալի, իր օլիգարխիկ գումարների: Մարդիկ, ովքեր կեղծ բարերարներ էին ներկայանում: Եվ ժողովուրդը պետք է հասկանա, որ այսօր վճռական օր է, մարդիկ պետք է դուրս գան փողոց՝ խաղաղ բողոքով իշխանությունը վերցնելու: Իշխանությունը պատկանում է ժողովրդին, այն հիմա ուզուրպացվել է»,- ասաց քաղաքագետը՝ շեշտելով, որ հիմա բոլորը պարտավոր են լինել փողոցում ու անվերապահ պաշտպանել Նիկոլ Փաշինյանին:

Հարցին՝ իսկ բացառում  եք, որ իշխանությունները կարող են ուժ կիրառել, քաղաքագետը պատասխանեց. «Իշխանությունները շատ թույլ են, որ ուժ կիրառեն: Բացառում եմ, որ Կարեն Կարապետյանը կունենա այն տղամարդկությունը և քաջությունը, որ իր վրա արյուն վերցնի, որովհետև վախկոտ դավաճանական գիծ է վարում, և խամաճիկ է, որին տեղադրել են ՀՀԿ-ին փրկելու համար»:

Մանրամասները՝ տեսանյութում: