Բրիտանիան մերժել է ՄԱԿ-ի Անվտանգության խորհրդի նիստ հրավիրելու՝ ՌԴ-ի պահանջը

Կրեմլը հայտարարել է, որ կտրականապես հերքում է ուկրաինական Բուչա քաղաքում խաղաղ բնակիչների սպանության հետ կապված որևէ մեղադրանք, գրում է Guardian-ը:

Կրեմլի խոսնակ Դմիտրի Պեսկովը լրագրողների հետ զրույցում ասել է, որ Բուչայում տեղի ունեցած իրադարձությունների փաստերն ու ժամանակագրությունը չեն համապատասխանում իրադարձությունների ուկրաինական վարկածին և միջազգային առաջնորդներին կոչ է արել չշտապել դատողություններ անել: Պեսկովը որևէ ապացույց չի ներկայացրել իր պնդումը հաստատելու համար, սակայն հայտնել է, որ «ռուս մասնագետները հայտնաբերել են տեսանյութերի խմբագրման նշաններ»:

ՌԴ ԱԳՆ պաշտոնական ներկայացուցիչ Մարիա Զախարովան էլ դժգոհել է, որ Բրիտանիան համաձայնություն չի տվել Բուչայում ստեղծված իրավիճակի շուրջ ՄԱԿ-ի Անվտանգության խորհրդի նիստ գումարելուն։ Նա հայտարարել է, որ Ռուսաստանը կրկին կպահանջի ՄԱԿ-ի Անվտանգության խորհրդի նիստ հրավիրել։

Նախօրեին թե՛ Ուկրաինան, թե՛ Ռուսաստանը պահանջել էին ՄԱԿ-ի Անվտանգության խորհրդի արտակարգ նիստ հրավիրել՝ քննարկելու Բուչայում տեղի ունեցած իրադարձությունները, որոնք հակամարտող կողմերը հակառակ կերպ են նկարագրում։

Ուկրաինայի նախագահ Վլադիմիր Զելենսկին իր երեկոյան ելույթում հայտարարել էր, որ «ռուսական օկուպացիայի ժամանակ Բուչայում և այլ քաղաքներում ռազմական հանցագործությունները երեքշաբթի ՄԱԿ-ի Անվտանգության խորհրդում քննարկման առարկա կդառնան»։

Սակայն ավելի ուշ ՄԱԿ-ում Ռուսաստանի ներկայացուցչի տեղակալ Դմիտրի Պոլյանսկին Telegram-ում գրել է, որ Ռուսաստանը պահանջում է, որ այդ հանդիպումն անցկացվի մեկ օր շուտ՝ երկուշաբթի։

Տաթև Ֆռանգյան