Բաքուն ռուսների պատկերացրած կառավարելիության շրջանակից դուրս եկավ․ ՌԴ-ն ի վիճակի չէ կրելու երաշխավորի բեռը․ Ռուբեն Մեհրաբյան․ ՏԵՍԱՆՅՈՒԹ

Factor TV-ի հարցազրույցը քաղաքական վերլուծաբան Ռուբեն Մեհրաբյանի հետ

-Պարո՛ն Մեհրաբյան, ապրիլի 6-ին Փաշինյան-Ալիև հանդիպումն է նախատեսվում՝ ԵՄ Խորհրդի նախագահ Շառլ Միշելի մասնակցությամբ։ Երկու ղեկավարների դեմ առ դեմ հանդիպման մասին պայմանավորվածություն չկա, գոնե պաշտոնապես չի հայտարարվել։ Նիկոլ Փաշինյանը հայտարարեց, որ Հայաստանը պատրաստ է խաղաղության բանակցությունների անհապաղ մեկնարկին և այդ հանդիպմանը գնում է՝ այդ բանակցությունների մեկնարկի հետ կապված հարցերը համաձայնեցնելու։ Հաշվի առնելով Բաքվի շարունակվող սադրանքներն Արցախում՝ որքանո՞վ է իրատեսական դա՝ ըստ Ձեզ։

-Այստեղ խնդիր կա զսպելու Ադրբեջանին, և ինքնին այս հանդիպումը եվրոպական հարթակում զսպող գործոն է միջազգային հարաբերությունների ներկայիս իրավիճակում։ Կարծում եմ՝ հայկական դիվանագիտության ջանքերն ուղղված են ճիշտ ուղղությամբ։ Ալիևը չի կարող որոշ գործոններ ուղղակի շրջանցել և արհամարհել, նա ամենազոր չէ, և այո՛, պետք է այդ գործոնների զսպող համադրության վեկտորն ուղղել դեպի Ադրբեջան, և Բաքվին զսպել իր նկրտումների մեջ, ինչն էլ փորձ է արվում անել։ Որքանով կստացվի՝ կախված է մեր դիվանագիտության արդյունավետությունից, ինչպես նաև մի շարք այլ գործոններից՝ կապված դիրքավորման հետ այս իրավիճակում, որ իրադարձությունների այս շղթայում Հայաստանը կարողանա առավելագույնս արդյունավետ ձևով օգտագործել իր հնարավորությունները, որոնք, անկասկած, ունի։

-Մինչ մենք դիվանագիտությունից ենք խոսում, Ադրբեջանը շարունակում է մնալ ռազմական ուժի կողմնակից։ Վարչապետ Փաշինյանն էլ Կառավարության նիստում ասաց, որ նոր սադրանքների և հարձակումների է նախապատրաստվում Բաքուն։ Կգնա՞ է՛լ ավելի սրացման, ըստ Ձեզ՝ և՛ Արցախում, և՛ հայ-ադրբեջանական սահմանին։

-Կասկածից վեր է, որ Ադրբեջանի համար նախընտրելին կլինի մեկ հարվածով իր բոլոր հարցերը լուծելը։ Ադրբեջանը դա չի թաքցնում, և դա էլ ունի իր բացատրությունը․ հաշվի առնելով ուժերի այն հարաբերակցությունը, որը ձևավորվեց 2020 թվականի պատերազմի արդյունքում, Ադրբեջանին թույլ է տալիս նման պլաններ մտմտալ։ Այլ հարց է, որ ուժային գործողությունների պլանների գործարկումը քաղաքական գին է արժենալու։ Ամբողջ խնդիրն այն է, որ Ադրբեջանը հիմա վստահ չէ, թե այդ գինն ինչպիսին է լինելու, ըստ այդմ՝ վստահ չէ, թե այդ գինն իրեն ձեռնտու կլինի՞, թե՞ ոչ։ Թե՞ կարող է այնպիսի գին լինել, որ Ադրբեջանը քաղաքական բանկրոտի վերածվի և գամվի անարգանքի սյունին, ինչը հաստատապես չի ուզում։ Այնտեղ հաշվել գիտեն, և նման քայլից հաստատապես ձեռնպահ կմնան։

Հարցազրույցն ամբողջությամբ՝ տեսանյութում։

Թամարա Հակոբյան