21.08.2026 | 12:03
46-ամյա Ռոնալդինյոն վերսկսում է կարիերան
Ռուսական զորքերը գրավել են Իզյումը․ Ուկրաինայի ԶՈՒ գլխավոր շտաբ
Քաղաքականություն
01.04.2022 | 18:10
Ռուսական զորքերը վերահսկում են Խարկովի մարզի շրջկենտրոն Իզյում քաղաքը։ BBC-ի փոխանցմամբ՝ այս մասին հայտնել է Ուկրաինայի Զինված ուժերի գլխավոր շտաբը։
Ռուսաստանի Պաշտպանության նախարարությունը Իզյումի գրավման մասին հայտնել էր դեռևս մարտի 24-ին, սակայն հետո Իզյումի իշխանությունները հայտարարել էին, որ քաղաքի համար մարտերը շարունակվում են։
Լրատվականը նշում է, որ Իզյումի բնակչությունը կազմում է ընդամենը 50 հազար մարդ, սակայն քաղաքը երկաթուղային կարևոր հանգույց է։
Հիշեցնենք՝ մարտի 29-ին Ստամբուլում կայացել էր Ռուսաստանի և Ուկրաինայի միջև պատերազմի սկզբից ի վեր երկու երկրների պատվիրակությունների երրորդ դեմ առ դեմ հանդիպումը: Հանդիպումից հետո ուկրաինական կողմը հայտարարեց, որ ՌԴ-ին է փոխանցել իր գրավոր առաջարկությունները, ի պատասխան՝ ՌԴ-ն հայտարարեց Կիևի և Չեռնիգովի ուղղությամբ ռազմական գործողությունների ինտենսիվության կրճատման մասին։
Ուկրաինայի ԳՇ-ն հայտարարում է, որ ՌԴ-ն որոշ ուղղություններում հետ է քաշում իր զորքերը, սակայն դա ավելի շատ զորքերի վերաբաշխում է գնահատվում։ Այսօր էլ իր ուղերձում Ուկրաինայի նախագահ Վլադիմիր Զելենսկին զգուշացրել է, որ վերջին մի քանի օրվա ընթացքում Ռուսաստանի կողմից իր զորքերի դուրսբերումը երկրի հյուսիսից և կենտրոնից ընդամենը ռազմական մարտավարություն է՝ հարավ-արևելքում նոր հզոր հարձակումների համար ուժեր հավաքելու նպատակով։
Տաթև Ֆռանգյան
