09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Բայրամովը հայտարարել է, թե Բաքուն Հայաստանից չի ստացել ադրբեջանական առաջարկների պատասխանը
Քաղաքականություն
31.03.2022 | 17:04
Ադրբեջանի ԱԳ նախարար Ջեյհուն Բայրամովն այսօր ԵԱՀԿ գործող նախագահ, Լեհաստանի ԱԳ նախարար Զբիգնև Ռաուի հետ մամուլի ասուլիսում մի շարք հայտարարություններով է հանդես։ Ադրբեջանական լրատվամիջոցների փոխանցմամբ՝ Բայրամովը նշել է, որ նոր հնարավորություններ են բացվել հայ-ադրբեջանական հարաբերությունների կարգավորման համար։
Նա կրկին խոսել է խաղաղության պայմանագրից ու նշել, որ մեկ ամիս առաջ Հայաստանին նոր առաջարկ է արվել հարաբերությունների կարգավորման գործընթացի վերաբերյալ, ներկայացվել են 5 հիմնական սկզբունքներ։
«Մենք դեռ սպասում ենք կոնկրետ պատասխանի։ Հայաստանի կողմից հնչում են մի շարք դրական ուղերձներ, մենք դա տեսնում ենք։ Կցանկանայինք ենթադրել, որ սա Հայաստանի լուրջ մոտեցման դրսևորումն է այս հարցում, ժամանակն է իրական քայլեր ձեռնարկել։ Հուսով ենք, որ արդյունքները շուտով տեսանելի կլինեն»,- ասել է Բայրամովը՝ այդպես էլ չընդունելով, որ Հայաստանը վաղուց ուղարկել է իր առաջարկներն ու պատասխանը պաշտոնական Բաքվին և սպասում է արձագանքի։
Հիշեցնենք, որ ավելի վաղ ՀՀ-ն էր դիմել ԵԱՀԿ Մինսկի խմբին՝ Հայաստանի ու Ադրբեջանի միջև խաղաղության պայմանագրի շուրջ գործընթացի համար։
Այսօր Կառավարության նիստում էլ վարչապետ Նիկոլ Փաշինյանը հայտարարեց, որ պաշտոնական Երևանը Բաքվից 5 առաջարկները ստանալուց մի քանի օր անց գրավոր պատասխանել է դրանց։ Փաշինյանը նշել էր, որ Հայաստանին առաջարկը փոխանցել է ԵԱՀԿ Մինսկի խմբի համանախագահներից մեկը, և հայկական կողմը հենց այդ համանախագահի միջոցով է փոխանցել Բաքվին։
Էմմա Չոբանյան
