14.12.2025 | 13:28
Բռնցքամարտի Հայաստանի հավաքականը պատմական արդյունքով է վերադարձել հայրենիք
Իշխանություն փոխանցելու մասին խոսք չի եղել Սերժ Սարգսյանի հրաժարականի առթիվ ՀՀԿ խմբակցության նիստում
Քաղաքականություն
24.04.2018 | 18:38
Վարչապետ Սերժ Սարգսյանի հրաժարականից հետո անորոշության մատնված ՀՀԿ-ականներից Factor.am-ին հայտնի դարձավ, որ մինչ հրաժարականը ԱԺ-ում հրավիրված ՀՀԿ խմբակցության նիստում խոսք չի եղել իշխանություն փոխանցելու ու արտահերթ ընտրությունների մասին։ Սերժ Սարգսյանի հրաժարականի որոշումը անսպասելի է եղել ՀՀԿ-ականների համար։ ՀՀԿ խմբակցության ղեկավար Վահրամ Բաղդասարյանը Սերժ Սարգսյանի հրաժարականի հրապարակումից առաջ՝ ժամը 3-ին, նիստի է հրավիրել ՀՀԿ պատգամավորներին ու հայտնել այդ լուրը։
Թե ինչ է լինելու Սերժ Սարգսյանի հրաժարականից հետո` որևէ հստակեցում չի եղել, առավել ևս խոսք չի գնացել իշխանություն փոխանցելու ու ժողովրդի թեկնածուին վարչապետ նշանակելու կամ արտահերթ ընտրությունների մասին։ Նիստը շատ կարճ է տևել։ Հայտնի դարձավ նաև, որ Սերժ Սարգսյանի հրաժարականի մասին լուրը առանձնապես ծանր է ընդունել ՀՀԿ պատգամավոր, երգչուհի Շուշան Պետրոսյանը՝ չթաքցնելով հուզմունքը։
Ներկաները,սակայն, չեն տպավորվել: «Գիտենք, որ ոչ թե Սերժ Սարգսյանի, այլ իր համար էր լացում»,- իր տպավորությունը փոխանցեց ներկաներից մեկը։ ՀՀԿ-ում այժմ կատարյալ անորոշության մեջ են ու անհամբեր սպասում են Նիկոլ Փաշինյան-Կարեն Կարապետյան վաղվա բանակցություններին՝ հասկանալու համար, թե իրենց ինչ կարող է սպասել առաջիկայում, քանի որ տարիներ ի վեր տիրապետելով իշխանության լծակներին կամ դրանց գոնե մոտ լինելով, շատ բան ունեն կորցնելու։
Նշենք, որ երեկ նույն ժամին իր «Ֆլորենս» ռեստորանում Հայաստանի օլիգարխների հետ հանդիպել է վարչապետի ներկա պաշտոնակատար Կարեն Կարապետյանը և հայտնել Սերժ Սարգսյանի նախապատրաստվող հրաժարականի լուրը։ Հանդիպումը առաջինը լքել է Ֆուտբոլի ֆեդերացիայի նախագահ Ռուբեն Հայրապետյանը։ Օլիգարխները թերևս նույնպես դժգոհ են, որ Սերժ Սարգսյանը լքեց իրենց։
Մարինե Խառատյան
