«Եթե կարմիր բերետավորները հարձակվեին խաղաղապահների վրա, զինվորականները կտեսնեին ու շարժումը կվերածվեր քաղաքացիական պատերազմի». քաղտեխնոլոգ

Քաղաքական տեխնոլոգ Արմեն Բադալյանի կարծիքով Հայաստանում հեղափոխություն տեղի չի ունեցել, այլ՝ երիտասարդների միջոցով ստեղծվել է կառավարելի քաոս։ «Իշխանության համար կար էդ տարակուսանքը՝ ուժ կիրառե՞լ, թե՝ ոչ, էդ կամուկացը կար, բայց երբ խաղաղապահները միացան, պարզ դարձավ, որ բախումներ չեն լինի։ Կարմիր բերետավորները կարող էին ծեծել ուսանողներին, բայց պատկերացրեք, որ ծեծեին խաղաղապահներին։ Դա բոլոր զինվորականները կտեսնեին ու կվերածվեր քաղաքացիական պատերազմի»,- ասում է Արմեն Բադալյանը։

Վերջինիս կարծիքով՝ սա առաջին փուլն է տեխնոլոգիապես իրականացված իշխանափոխության։

«Որպեսզի Հայաստանում բարեփոխումներն առաջ գնան, պետք է լինի քաղաքական համակարգի վերաֆորմատավորում՝ քաղաքական համակարգից օլիգարխիայի դուրս մղում, ընտրական օրենսգրքի փոփոխություն, կուրս է վերցված Հայաստանը դարձնել այնպիսին, ինչպիսին Վրաստանն է»,- ասում է քաղաքական տեխնոլոգը։

Նա համոզված է, որ այս շարժումն ուներ զգացմունքային բովանդակություն, փոխարենը քաղաքական բովանդակություն չուներ, նույնիսկ մանկահասակ երեխաներն էին դուրս գալիս փողոց փակելու, «երեխաների մոտ տեղի ունեցողը խաղ էր ընկալվում»։

Պարոն Բադալյանը վստահ չէ, որ Նիկոլ Փաշինյանը կդառնա Հայաստանի «առաջին ջութակ»։ «Հատկապես եթե ընտրություններ լինեն, կարող է որոշակի գործընթացներ տեղի ունենան, որից հետո առաջին պլան գան պետական կառավարման երկրորդ էշելոնի մարդիկ, որոնք իրենց անունն այս ընթացքում չեն արատավորել»,- ենթադրում է քաղաքական տեխնոլոգը։

Մհեր Արշակյան