ՔՊ-ի կողմնակիցները ծեծել են այլախոհ անձի, պատգամավորները՝ մտել Վեդու ընտրատեղամասեր. «Անկախ դիտորդ»

«Առավոտյան Վեդի համայնքի Ուրցաձոր գյուղում ՔՊ-ի կողմնակիցները 13/24 տեղամասի մուտքի մոտ հարձակվել և ծեծի են ենթարկել մեկ այլախոհ անձի, գործողությունը զուգորդվել է նաև լրագրողի նկատմամբ սպառնալիքներով։ Այդ ամենը տեղի է ունեցել ոստիկանական զորքերի աչքի առաջ, որոնք չեն միջամտել կատարվածին»,- այս մասին Factor.am-ի հետ զրույցում ասաց «Անկախ դիտորդ» դաշինքի ներկայացուցիչ Դանիել Իոաննիսյանը։ Նրա խոսքով՝ դեպքի առթիվ ոստիկանությունում արդեն նյութեր են նախապատրաստվում։

Անդրադառնալով այսօր Արարատի մարզի Վեդի խոշորացված համայնքում անցկացված ՏԻՄ արտահերթ ընտրություններին` Իոաննիսյանը նկատեց՝ դրանք սպասվածից ավելի թեժ են անցել:

«Մի քանի լուրջ դեպքեր արձանագրվել են. օրինակ՝ չունենալով իրավունք` իշխող ուժի՝ «Քաղաքացիական պայմանագիր» կուսակցության երկու պատգամավորներ մտել են ընտրատեղամաս, ունեցել ենք ահազանգեր, որ Երևանից Վեդու բնակիչներ են ավտոբուսներով բերվել ընտրության, համայնքում գործել են նաև ընդհատակյա նախընտրական շտաբներ, իսկ կուտակումների մասին խոսելն ավելորդ է. դրանք երկու ուժի կողմից էլ եղել են»,- նշեց Իոաննիսյանը։

«Անկախ դիտորդ» դաշինքը նաև ահազանգ է ստացել, որ շտաբներում հավատարմագրված «Ժողովրդավարության իրավունք» միջազգային դիտորդական կազմակերպության ներկայացուցիչներն իրականում «Իմ հզոր համայնք» կուսակցության վստահված անձինք են.

«Նրանք ներկայանում էին որպես կուսակցության վստահված անձ, այնինչ կրում էին կազմակերպության վկայական»։

Հիշեցնենք՝ այսօր Արարատի մարզի Վեդի խոշորացված համայնքում ՏԻՄ արտահերթ ընտրություններ էին։ Համայնքում գործող բոլոր 13 ընտրատեղամասերը 20:00-ի դրությամբ փակվել են, այս պահին ընթանում է ձայների հաշվարկման գործընթացը։

Այս անգամ ընտրություններին մասնակցում էր քաղաքական 2 ուժ՝ «Քաղաքացիական պայմանագիր» և «Իմ հզոր համայնք» կուսակցությունները: Իշխող ուժը գլխավորում է Արարատի նախկին մարզպետ Գարիկ Սարգսյանը, իսկ «Իմ Հզոր համայնք» կուսակցության առաջին համարը Սպարտակ Թարթիկյանն է: Ընտրապայքարից հրաժարվել է դեկտեմբերի 5-ին 16,39% քվե ստացած «Հանրապետություն» կուսակցությունը:

Ռոզա Վարդանյան