21.08.2026 | 12:03
46-ամյա Ռոնալդինյոն վերսկսում է կարիերան
Էրդողանը հայտարարել է, որ Ուկրաինան և Ռուսաստանը մոտ են կոնսենսուսի բանակցությունների 6 կետերից 4-ի շուրջ
Քաղաքականություն
25.03.2022 | 19:02
Ուկրաինան և Ռուսաստանը բանակցություններում մոտ են կոնսենսուսի 6 կետերից 4-ի շուրջ։ Այս մասին Բրյուսելից վերադառնալիս լրագրողների հետ զրույցում հայտարարել է Թուրքիայի նախագահ Ռեջեփ Թայիփ Էրդողանը, գրում է «Անադոլու» գործակալությունը։
Նա շեշտել է, որ Անկարան հենց սկզբից մեծ ջանքեր է գործադրել Ուկրաինայի պատերազմին վերջ տալու համար։
«Կարծում եմ, որ բանակցություններում չորս կետերի շուրջ կա կոնսենսուս։ Առաջին կետը վերաբերում է ՆԱՏՕ-ին Ուկրաինայի անդամակցությանը։ Սկզբում Ուկրաինան պնդում էր դաշինքին անդամակցության հարցում, սակայն հետագայում Զելենսկին սկսեց խոսել մերժման հնարավորության մասին։ Մեկ այլ կետ վերաբերում է Ուկրաինայում ռուսերենին պաշտոնական լեզվի կարգավիճակ տալուն։ Սրա հետ ևս համաձայնել է Զելենսկին։ Այսպես թե այնպես գրեթե ողջ Ուկրաինան խոսում է ռուսերեն»,- ասել է Էրդողանը։
Նրա խոսքով՝ հակամարտող կողմերի քննարկած մեկ այլ կարևոր թեման վերաբերում է Ուկրաինայի ապառազմականացմանը։
«Իհարկե, Ուկրաինան պետություն է, ուստի լրիվ զինաթափման ընդունումը բացառվում է: Բայց այս հարցում նույնպես անհասկանալի կողմեր չկան։ Այսինքն՝ ուկրաինական կողմը հայտարարել է, որ կարող է որոշակի զիջումների գնալ նաև այս հարցում։ Բանակցությունների չորրորդ կետը վերաբերում է հավաքական անվտանգությանը. Ուկրաինան այս առումով նույնպես դրական մոտեցում է ցուցաբերել»,- շարունակել է Էրդողանը։
Թուրքիայի նախագահն ասել է, որ դեռ կոնսենսուս չկա Ղրիմի և Դոնբասի հարցում։ Ըստ նրա՝ արդյունքում Զելենսկին առաջարկել է Դոնբասի հարցով հանրաքվե անցկացնել։
Էմմա Չոբանյան
