17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
HRW-ը զգուշացնում է՝ ուկրաինական պատերազմը խորացնում է պարենային ճգնաժամը Մերձավոր Արևելքում և Հյուսիսային Աֆրիկայում
Տնտեսություն
21.03.2022 | 14:08
Ռուսաստանի ներխուժումն Ուկրաինա կարող է վատթարացնել Մերձավոր Արևելքում ու Հյուսիսային Աֆրիկայում պարենային ճգնաժամը։ Այս մասին հայտարարություն է տարածել է Human Rights Watch միջազգային իրավապաշտպան կազմակերպությունը, գրում է CNN-ը։
«Ե՛վ Ուկրաինան, և՛ Ռուսաստանը գյուղմթերքի առաջատար արտահանողներն են Մերձավոր Արևելքի և Հյուսիսային Աֆրիկայի շատ երկրներ, իսկ պատերազմի հետ կապված մատակարարման խափանումներն արդեն իսկ սաստկացնում են պարենային ապրանքների գների առանց այդ էլ աճը և աղքատության խորացումը», – ասվում է հայտարարության մեջ:
HRW-ի Մերձավոր Արևելքի ու Հյուսիսային Աֆրիկայի հարցերով տնօրեն Լամա Ֆաքիհն ասել է, որ գլոբալ սննդի շղթաները պահանջում են գլոբալ համերաշխություն ճգնաժամերի ժամանակ։
«Առանց սննդամթերքի մատակարարման և մատչելիության խնդրին ուղղված համաձայնեցված գործողությունների՝ Ուկրաինայի հակամարտությունը վտանգում է խորացնել պարենային համաշխարհային ճգնաժամը, մասնավորապես՝ Մերձավոր Արևելքում և Հյուսիսային Աֆրիկայում»,- ասել է նա։
Ուկրաինայի կառավարությունն արգելել է կարևոր գյուղմթերքի արտահանումը, այդ թվում՝ ցորենի, եգիպտացորենի, գարու, ինչպես նաև աղի և մսի։
HRW-ը նշում է, որ եթե նույնիսկ մատակարարման շղթան շուտով վերականգնվի, խնդիրները, հավանաբար, կշարունակվեն, քանի որ «ֆերմերները փախչում են ռազմական գործողություններից և հակամարտությունը ոչնչացնում է ենթակառուցվածքներն ու սարքավորումները»։ Ռազմական գործողությունները կարող են նվազեցնել գալիք բերքահավաքի ծավալները։
Նշենք, որ ըստ Gro Intelligence գյուղատնտեսական տվյալների վերլուծական կազմակերպության՝ Ռուսաստանը և Ուկրաինան միասին պատասխանատու են ցորենի գլոբալ արտահանման մոտ 30 տոկոսի համար։
Էմմա Չոբանյան
