16.09.2026 | 19:50
Նիժնի Տապըռի գեղ եք ուզում, որ ոնց ուզեք՝ ձեր «Մայբախ»-ները քշեք. Փաշինյան
ԵՄ-ն հաստատել է Ռուսաստանի դեմ պատժամիջոցների 4-րդ փաթեթը
Քաղաքականություն
15.03.2022 | 13:30
Եվրամիությունն ընդլայնել է Ռուսաստանի դեմ պատժամիջոցները՝ Ուկրաինայի դեմ պատերազմ սանձազերծելու համար։ ԵՄ անդամ բոլոր 27 երկրների կառավարությունների ներկայացուցիչները մարտի 15-ին հաստատել են սահմանափակումների չորրորդ փաթեթը։ Այս մասին հայտնում է Եվրամիության խորհրդի մամուլի ծառայությունը, գրում է DW-ի ռուսական ծառայությունը։
Պատժամիջոցներն ուժի մեջ կմտնեն ԵՄ պաշտոնական պարբերականում հրապարակվելուց հետո։ Եվրոպական լրատվամիջոցները նշում են, որ որոշումը կհրապարակվի այսօր ավելի ուշ։
«Քանի դեռ նախագահ Պուտինի պատերազմն ուկրաինացի ժողովրդի դեմ շարունակվում է, Ուկրաինային աջակցելու և Կրեմլի ռազմական մեքենայի ֆինանսավորումը խաթարելու մեր վճռականությունը շարունակվում է։ Այս պատժամիջոցների նպատակն է, որպեսզի նախագահ Պուտինը դադարեցնի այս անմարդկային և անիմաստ պատերազմը»,- ասել է ԵՄ արտաքին քաղաքականության հարցերով հանձնակատար Ժոզեպ Բորելը։
Ավելի վաղ Ֆրանսիայի ֆինանսների և էկոնոմիկայի նախարար Բրյունո Լը Մերը հայտարարարել է, որ պատժամիջոցների նոր փաթեթը կհաստատվի այսօր, այն կվերաբերվի 600 մարդու։
Պատժամիջոցների չորրորդ փուլը ներառում է Ռուսաստանի հետ առևտրի նոր սահմանափակումներ։ Խոսքը, մասնավորապես, Ռուսաստանի Դաշնություն շքեղության ապրանքների մատակարարման արգելքի մասին է, ինչպես նաև Եվրամիություն ռուսական պողպատի և երկաթի ներմուծման դադարեցման։
Կարգելվեն նաև Ռուսաստանի Դաշնության էներգետիկայի ոլորտում նոր ներդրումները, տեխնոլոգիաների կամ սարքավորումների մատակարարումը, ինչպես նաև էներգետիկ ռեսուրսների որոնման, արտադրության կամ վերամշակման ծառայությունների մատուցումը:
Արգելքը կանդրադառնա նաև ցանկացած ՌԴ քաղաքացու կամ ռուսական ընկերության վարկային ծառայությունների մատուցման վրա։
Տաթև Ֆռանգյան
