Անկարայում ակնկալում են, որ ուկրաինական պատերազմի ֆոնին Թուրքիայի ռազմարդյունաբերության նկատմամբ հետաքրքությունը կավելանա

Թուրքիայի ռազմարդյունաբերության վարչության ղեկավարն ակնկալում է, որ ՌԴ-ի և Ուկրաինայի միջև պատերազմի հետևանքով կավելանա հաճախորդների հետաքրքությունը, գրում են թուրքական լրատվամիջոցները։

Անթալիայի դիվանագիտական ֆորումի շրջանակում պաշտպանական արդյունաբերության նախագահության ղեկավար Իսմայիլ Դեմիրը նշել է, որ իր համոզմամբ՝ պատերազմից հետո Թուրքիան կդառնա ռազմական տեխնիկայի ճանաչված մատակարար։ Մատնանշելով Բալթյան, ինչպես նաև Բալկանյան երկրներում անապահովության աճի զգացումը՝ Դեմիրն ասել է, որ նրանք գտնվում են «իրազեկման և նախապատրաստական շրջանում» իրենց պաշտպանական ունակությունների հզորացման հարցում։

Թուրքիան, որը լավ հարաբերություններ ունի ՌԴ-ի հետ, նաև Ուկրաինայի ռազմական դաշնակիցն է և Կիևին միլիոնավոր դոլարների ռազմական օգնություն է մատակարարել։ Այս փաթեթում ներառված են Ada դասի կորվետներ և Bayraktar TB-2 զինված անօդաչու սարքերը: Պատերազմից առաջ Ուկրաինան մոտ 20 «Բայրաքթար» էր շահագործում, դրանք զգալի հարվածներ հասցրել են երկիր ներխուժող ռուսական ուժերին՝ չնայած որոշակի կորուստներին:

Դեմիրի կանխատեսումներն արձագանքն են Եվրոպայի, Ասիայի և Աֆրիկայի այլ երկրներ թուրքական ռազմական տեխնիկայի գնման վերաբերյալ հայտարարություններին։ Դեմիրը նաև ասել է, որ Թուրքիան հայտնի երկիր կդառնա ոչ միայն իր անօդաչու սարքերով, այլև ռազմական տեխնիկայի լայն տեսականիով։

Սակայն Ուկրաինայի դեմ ՌԴ-ի պատերազմն ուշադրություն է հրավիրել Մոսկվայի հետ Թուրքիայի կապերի վրա։ Անկարան փորձում է չեզոքություն պահպանել և կողմերին հորդորում ընդունել իր միջնորդությունը։ Թուրքիայի նախագահ Ռեջեփ Թայիփ Էրդողանն էլ հայտարարել է, որ կապերը չի խզի Ռուսաստանի հետ։

Դեմիրը խոսել է նաև ռուսական C-400 համակարգերի նոր խմբաքանակի մատակարարումներից՝ նշելով, որ այդ հարցը քննարկվում է։
«Մենք կմտածենք պաշտպանական նախագծերի ճակատագրի մասին, երբ ամեն ինչ հանդարտվի»,- ասել է նա։

Էմմա Չոբանյան