10.09.2026 | 17:01
1.45 մլրդ դրամ՝ Գյումրու թիվ 2 պոլիկլինիկայի հիմնանորոգման համար
Ավիահարվածներ՝ Կիևին, երկինքը փակելու նոր կոչ և բանակցությունների 4-րդ փուլ. պատերազմի 19-րդ օրը․ ՏԵՍԱՆՅՈՒԹ
Քաղաքականություն
14.03.2022 | 23:20
Ռուս-ուկրաինական պատերազմի 19-րդ օրվա գիշերը և լուսաբացը գերլարված է անցել մայրաքաղաք Կիևում և հարակից քաղաքներում։ Ուկրաինայի Արտակարգ իրավիճակների պետական ծառայության հաղորդմամբ՝ ռուսական զորքերն օդային հարվածներ են հասցրել Կիևին, Լվովին, Մարիուպոլին, Ռովնոյին և Ժիտոմիրի շրջանին։
Ուկրաինայի հայերի միության փոխնախագահ Դավիթ Մկրտչյանը Factor TV-ի հետ զրույցում նշեց՝ ծանր մարտերը շարունակվում են, լարվածությունը չի թուլանում, պարզապես թեժ իրավիճակը պարբերաբար տեղափոխվում է երկրի տարբեր հատվածներ։ Անդրադառնալով մարդասիրական միջանցքներին՝ նա ընդգծեց՝ դրանք նախատեսված են հիմնականում օտարերկրացիներին տարհանելու համար։
Գիշերը հրթիռակոծության է ենթարկվել նաև Ժիտոմիրի շրջանի Ստավիշչե բնակավայրը։ Նախնական տվյալներով՝ ավերվել է յոթ վարչական շենք։ Չորս մարդ վիրավորվել է, մյուս տուժածների որոնումները շարունակվում են։ Ռովնեի շրջանի ղեկավար Վիտալի Կովալը հայտնել է, որ ավիահարվածի հետևանքով վնասվել է հեռուստաաշտարակը։ Մարզում հեռուստառադիոհեռարձակումը դադարեցվել է։
Շարունակվող թեժ ռազմական գործողությունների ֆոնին Ուկրաինայի նախագահը կրկին երկրի երկինքը փակելու կոչ է արել ՆԱՏՕ-ին։
Ուկրաինայի Գլխավոր դատախազությունը հայտնել է, որ ռազմական գործողությունների մեկնարկից ի վեր 90 երեխա է զոհվել, ավելի քան 100-ը՝ վիրավորվել։ Պաշտոնական տեղեկությունների համաձայն՝ միայն երեկ Նիկոլաևի շրջանում գնդակոծության հետևանքով զոհվել է երկու երեխա, ևս երկուսը՝ վիրավորվել։ Ուկրաինայի հայերի միությունից էլ հայտնել են հայ համայնքի ներկայացուցիչներից 10 զոհի մասին։
Երեկ հրետակոծության ժամանակ Իրպինում գնդակահարվել է ամերիկացի լուսանկարիչ և ռեժիսոր Բրենթ Ռենոն։ Նա առավել հայտնի է հակամարտությունների գոտիներից մարդկային պատմությունների ներկայացմամբ:
Ռազմական գործողություններին զուգահեռ՝ այսօր տեղի է ունեցել Ուկրաինայի և Ռուսաստանի պատվիրակությունների միջև բանակցությունների չորրորդ փուլը, այս անգամ՝ տեսակոնֆերանսի ձևաչափով։ Ուկրաինայի նախագահի աշխատակազմի ղեկավարի խորհրդական Միխայիլ Պոդոլյակը նշել է՝ բանակցությունները խաղաղության մասին են։
Ավելի ուշ Պոդոլյակը հայտնել է ռուս-ուկրաինական բանակցություններում «տեխնիկական դադարի» մասին՝ առանձին սահմանումները հստակեցնելու համար։ Բանակցությունները կշարունակվեն վաղը։
Մինչ այդ, ԱՄՆ-ի և Ֆրանսիայի նախագահները պայմանավորվել են ուժեղացնել Ռուսաստանի դեմ արդեն իսկ սահմանված պատժամիջոցները, աջակցել Ուկրաինային և ձեռնարկել բոլոր օգտակար միջոցները՝ ռազմական գործողություններին վերջ տալու համար։ Սակայն առայժմ չի նշվում, թե այս անգամ ինչ խստացումների մասին է խոսքը։
Մանրամասները՝ տեսանյութում
Ռոզա Վարդանյան
