ՌԴ դեմ պատժամիջոցները մուրճով հարված են մեր դաշնակիցներին․ ՌԴ փոխարտգործնախարար

Ուկրաինական իրադարձությունների համատեքստում Ռուսաստանի դեմ սահմանված  պատժամիջոցները հարվածել են նաև Եվրասիական տնտեսական տարածքում ՌԴ դաշնակիցներին, սակայն միության անդամ երկրները միասին միանգամայն ունակ են կասեցնել սահմանափակումների բացասական հետևանքները։«Իզվեստիային» տված հարցազրույցում նման կարծիք է հայտնել ՌԴ փոխարտգործնախարար Ալեքսանդր Պանկինը։

«Ռուսաստանի դեմ պատժամիջոցները ոչ միայն հետընթաց են, այլև, հավանաբար, մուրճով հարված մեր դաշնակիցներին՝ եվրասիական տարածքում ամենամոտ տնտեսական և առևտրային գործընկերներին», – խոստովանել է դիվանագետը։

Միևնույն ժամանակ, նա ընդգծել է, որ պատժամիջոցների և դրանց վերացման թեման երկար ժամանակ եղել է եվրասիական օրակարգում, և ԵԱՏՄ-ն ունի մի ամբողջ շարք գործիքներ՝ բացասական ազդեցությունը որոշակիորեն փոխհատուցելու համար, մասնավորապես՝ ազգային արժույթներով հաշվարկներ և ֆինանսավորման նպատակով տարածաշրջանային զարգացման բանկերի ներգրավման հնարավորությունը։

«Ինձ համար դժվար է պատկերացնել, թե ով կփոխարինի Ռուսաստանին ԵԱՏՄ շուկաներում՝ հաշվի առնելով այն փաստը, որ մենք ունենք ապրանքների, ծառայությունների, կապիտալի և աշխատուժի ազատ տեղաշարժ», – նշել է դիվանագետը։

Նա հավելել է, որ ԵԱՏՄ շրջանակներում համագործակցության շատ ծրագրեր, որոնք արդեն իսկ թղթի վրա են և ունեն ճանապարհային քարտեզներ և գործողությունների ցանկ, «կիրականացվեն ինտենսիվ և արագացված՝ ՌԴ-ի վրա անհավատալի պատժամիջոցների ճնշման պայմաններում»:

Տաթև Ֆռանգյան