16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Ուկրաինայի ԱԳ նախարարը մանրամասներ է ներկայացրել Լավրովի հետ բանակցություններից
Քաղաքականություն
10.03.2022 | 14:22
Թուրքիայի Անթալիա քաղաքում ավարտվել է Ուկրաինայի ԱԳ նախարար Դմիտրի Կուլեբայի և ՌԴ ԱԳ նախարար Սերգեյ Լավրովի հանդիպումը․ այն տևել է մեկուկես ժամ, գրում է Korrespondent-ը։
Հանդիպմանը հետևած մամուլի ասուլիսում Կուլեբան հայտարարել է, որ քննարկվել են հումանիտար միջանցքների բացման և կրակի դադարեցման հարցերը, որի շուրջ դեռ պայմանավորվել չի հաջողվել։
Նա, սակայն, նշել է, որ Լավրովը Ռուսաստանի ղեկավարությանը կարող է հասցնել հրադադարի էությունը։
Կուլեբան ասել է, որ բանակցությունները ծանր են եղել։
«Ես այսօր լսեցի, որ հրադադարը կապված է Ուկրաինայի հասցեին Պուտինի պահանջների կատարման հետ։ Ուկրաինան չի հանձնվել ու չի հանձվի։ Մենք պատրաստ ենք դիվանագիտական լուծումների, սակայն դրանք դեռ չկան։ Անձնուրաց պաշտպանելու ենք մեր հողը ռուսական ագրեսիայից»,- ասել է Կուլեբան։
Բացի այդ, նա հայտնել է, որ պայմանավորվածություն է ձեռք բերվել ևս մեկ նման հանդիպման անցկացման մասին։
Որոշ ԶԼՄ-ի հաղորդմամբ՝ բանակցությունների ընթացքում Լավրովն ասել է, որ «սառը խաղաղությունը սառը պատերազմից լավ է»։
Էմմա Չոբանյան
