18.12.2025 | 23:24
ՀՀ տարածքում ավտոճանապարհները հիմնականում անցանելի են
ԱՄՆ հետախուզության պաշտոնյաները զգուշացրել են՝ Պուտինը պատրաստվում է կրկնապատկել Ուկրաինա ներխուժման ջանքերը
Քաղաքականություն
09.03.2022 | 17:12
ԱՄՆ հետախուզության պաշտոնյաները նախազգուշացրել են, որ ՌԴ նախագահ Վլադիմիր Պուտինն ավելի վճռական է պատրաստվում ընդլայնել Ուկրաինա իր ներխուժումը՝ չնայած վատ պատրաստվածությանը և ռուսական տնտեսության վրա պատժամիջոցների հետևանքներին։ Այս մասին գրում է The Hill-ը։
«Կարծում եմ՝ Պուտինը զայրացած ու վշտացած է։ Նա, ամենայն հավանականությամբ, կկրկնապատկի ջանքերը և կփորձի տապալել ուկրաինացի զինվորականներին՝ հաշվի չառնելով քաղաքացիական զոհերը»,- ասել է ԱՄՆ Կենտրոնական հետախուզության վարչության (ԿՀՎ) տնօրեն Ուիլյամ Բըրնսը Ներկայացուցիչների պալատի հետախուզության հանձնաժողովում լսումների ժամանակ։
Հետախուզության պաշտոնյաները նաև նշել են Պուտինի բազմաթիվ սխալ հաշվարկները, մինչ Ռուսաստանը շարունակում է իր ավերիչ հարձակումը Ուկրաինայի վրա:
«Պուտինը երկար տարիներ «եփվել» է դժգոհության ու ամբիցիաների համակցության մեջ»,- ասել է Բըրնսը։
Ազգային հետախուզության տնօրեն Ավրիլ Հեյնսն էլ ասել է, որ թեև Պուտինն ակնկալում էր պատժամիջոցներ, սակայն չէր կանխատեսում այն աստիճանը, որ ԱՄՆ-ը, այլ երկրներ և մասնավոր ընկերություններ «կխաթարեն Արևմուտքի գործողությունները մեղմելու իր կարողությունը»:
«Մեր գնահատմամբ՝ Պուտինը վիրավորված է, որ Արևմուտքը պատշաճ հարգանք չի ցուցաբերում, և ռազմական գործողությունն ընկալում է որպես պատերազմ, որում նա չի կարող պարտություն թույլ տալ։ Բայց այն, ինչ նա կարող է պատրաստ լինել ընդունել որպես հաղթանակ, ժամանակի ընթացքում կարող է փոխվել՝ հաշվի առնելով այն զգալի ծախսերը, որոնք իրականացնում է։ Մեր վերլուծաբանները գնահատում են, որ Պուտինին դժվար թե զսպեն նման անհաջողությունները, փոխարենը նա կարող է էսկալացնել իրավիճակը՝ կրկնապատկելով ջանքերը»,- ասել է նա։
Պաշտոնյաները նաև օրենսդիրներին ասել են, որ Ռուսաստանը պատերազմի երկու շաբաթների ընթացքում 2000-4000 զոհ է ունեցել։
Էմմա Չոբանյան
