26.11.2024 | 22:26
Իմ կալանքը ծառայում է Ադրբեջանի բռնապետության և նրա հանցակից ռուսական կայսրության շահերին․ Ադրբեջանում բանտարկված դիվանագետ
ԵՄ-ն խստացնում է Ռուսաստանի և Բելառուսի դեմ պատժամիջոցները
Քաղաքականություն
09.03.2022 | 16:22
ԵՄ մշտական ներկայացուցիչները պայմանավորվել են նոր պատժամիջոցներ կիրառել ռուս ղեկավարների ու օլիգարխների, նրանց ընտանիքի անդամների նկատմամբ, որոնք կապված են Ուկրաինա ՌԴ ագրեսիայի հետ։ Այս մասին տեղեկանում ենք ԵՄ խորհրդում ֆրանսիական ներկայացուցչության թվիթերյան գրառումից։
Նշվում է, որ պատժամիջոցներ կսահմանվեն նաև Բելառուսի դեմ։
Մասնավորապես, ընդունված միջոցները ներառում են SWIFT համակարգից բելառուսական երեք բանկերի անջատում։ Հստակեցվում է նաև կրիպտոարժույթների հարցը, լրացվում տեխնոլոգիաների ու ապրանքների ցանկը, որոնք հնարավոր չէ արտահանել։
Բացի այդ, հավանության են արժանացել ծովային ոլորտի դեմ ուղղված պատժամիջոցները։
«Մենք խստացնում ենք մի շարք պատժամիջոցներ՝ ի պատասխան Ուկրաինայի դեմ Ռուսաստանի ռազմական ագրեսիայի, այդ թվում՝ պատժամիջոցների ցուցակում ընդգրկում ենք ևս 160 մարդու՝ օլիգարխների, Դաշնային խորհրդի անդամների»,- իր հերթին Twitter-ում գրել է Եվրահանձնաժողովի նախագահ Ուրսուլա ֆոն դեր Լյայենը։
Ավելի ուշ Եվրահանձնաժողովը հրապարակել է մամուլի հաղորդագրություն, ըստ որի՝ պատժամիջոցներ են սահմանվում 14 ձեռնարկատերերի և նրանց ընտանիքների անդամների նկատմամբ, որոնք գործում են «տնտեսության հիմնական ոլորտներում և հանդիսանում են Ռուսաստանի Դաշնության համար միջոցների զգալի աղբյուր»։
Պատժամիջոցների տակ են նաև Դաշնային խորհրդի 146 անդամներ, որոնք վավերացրել են, այսպես կոչված, «ԼԴԺՀ-ի հետ Ռուսաստանի Դաշնության բարեկամության և համագործակցության և փոխօգնության մասին» պայմանագրերը։
Եվրահանձնաժողովի հաղորդագրությունում նշվում է, որ ԵՄ-ն սահմանափակումներ է սահմանում նաև ռադիոկապի տեխնոլոգիաների՝ Ռուսաստան արտահանման համար։ Բացի այդ, ԵՄ-ն ընդգրկում է բեռնափոխադրումների ռուսական ծովային ռեգիստրը պետական կազմակերպությունների ցանկում, որոնք ենթակա են ֆինանսական սահմանափակումների։
Փաստաթղթում պարզաբանվում է, որ Բրյուսելի կողմից որոշ միջոցներ են ձեռնարկվում՝ կանխելու Ռուսաստանի Դաշնության կողմից նախկին պատժամիջոցները շրջանցելու հնարավորությունը, այդ թվում՝ Բելառուսի միջոցով։ Խոսքը, մասնավորապես, բելառուսական մի շարք բանկերի կողմից SWIFT համակարգի օգտագործման սահմանափակման մասին է։
Էմմա Չոբանյան
