Նրանք կարող են քանդել մեր տների, եկեղեցիների պատերը, բայց չեն հասնի մեր հոգուն․ Զելենսկու նոր ուղերձը․ ՏԵՍԱՆՅՈՒԹ

Ուկրաինայի նախագահ Վլադիմիր Զելենսկին հայտարարել է, որ ռուսները « կարող են քանդել մեր տների, եկեղեցիների պատերը, բայց չեն հասնի մեր հոգուն»: Վերջինս նաև կոչ է արել հնարավորինս արագ Ուկրաինային տրամադրել մարտական ​​ինքնաթիռներ։ Այս մասին նա ասել է իր Telegram ալիքում տեղադրված տեսաուղերձում։

«14 օր լայնածավալ դաժան պատերազմ, ահաբեկչություն մեր ժողովրդի դեմ։ Քաղաքների ավերածություն, ամբողջ թաղամասերի շրջափակում, մշտական ​​ռմբակոծում։ 14 օր շարունակ կենսական որոշման բացակայություն։ Մենք նման որոշում կընդունեինք մեկ ժամվա ընթացքում, եթե անհրաժեշտ լիներ օգնել մեր բարեկամներին։ Ուկրաինան ռուսական ներխուժման առաջին օրից կրկնում է գործընկերներին․ եթե չփակեք երկինքը, դուք մեղավոր կլինեք այս աղետի համար»,- ընդգծել է Զելենսկին։

Վերջինս նշել է, որ Ռուսաստանը հրթիռներ, ինքնաթիռներ և ուղղաթիռներ է օգտագործում խաղաղ բնակչության, քաղաքների և ենթակառուցվածքների դեմ։

«Աշխարհի մարդասիրական պարտքն է արձագանքել: Բայց որոշում չկա: Մենք երախտապարտ ենք Լեհաստանին այլընտրանքի համար՝ Ուկրաինային մարտական ​​ինքնաթիռներ տրամադրելու պատրաստակամության համար: Խնդիրը նյութատեխնիկական ապահովման մեջ է: Փաստորեն, տեխնիկական խնդիր է»,- ասել է նա:

«Լեհաստանը պաշտոնական որոշում ունի փոխանցել ինքնաթիռները համապատասխան բազա, ամերիկյան բազա։ Մենք նաև հաստատում ունենք, մենք բոլորս լսել ենք, լրատվամիջոցներից կարդացել ենք, որ Լեհաստանի հետ ամերիկյան կողմի պայմանավորվածությունը կա, այն ձեռք է բերվել։ Սակայն սրա հետ մեկտեղ մենք լսում են, թե Լեհաստանի առաջարկներն իբրև թե անհիմն են։ Եվ սա ասում են Վաշինգտոնում։ Այդ մասին մենք նաև ձեզ հետ կարդացել ու տեսել ենք։ Ե՞րբ է լինելու որոշումը։ Լսե՛ք․ մեզ մոտ պատերազմ է․․․ Սա պինգ-պոնգ չէ, սա մարդկային կյանքերի մասին է։ Մենք ևս մեկ անգամ խնդրում ենք․ լուծեք այն արագ։ Պատասխանատվությունից մի՛ խուսափեք, մեզ ինքնաթիռներ ուղարկեք»,- կոչ է արել Զելենսկին։

Մանրամասները՝ տեսանյութում

Տաթև Ֆռանգյան