ՄԱԳԱՏԷ-ն կորցրել է կապը Չեռնոբիլի ԱԷԿ-ի անվտանգության մոնիթորինգի համակարգերի հետ

Չեռնոբիլի ատոմակայանն այլևս տվյալներ չի փոխանցում ՄԱԿ-ի ատոմային վերահսկողության մարմնին։ France 24-ի հաղորդմամբ՝ այս մասին հայտնել է գործակալությունը՝ մտահոգություն հայտնելով ուկրաինական օբյեկտում ռուսական հսկողության տակ աշխատող անձնակազմի համար։

Ատոմային էներգիայի միջազգային գործակալության (ՄԱԳԱՏԷ) ղեկավար Ռաֆայել Գրոսսին նշել է, որ «Չեռնոբիլի ԱԷԿ-ում տեղադրված պաշտպանական մոնիթորինգի համակարգերից տվյալների հեռահար փոխանցումը դադարեցվել է»։

«Գործակալությունն ուսումնասիրում է Ուկրաինայի այլ վայրերում անվտանգության մոնիթորինգի համակարգերի կարգավիճակը և շուտով կտրամադրի լրացուցիչ տեղեկատվություն»,- ասվում է հաղորդագրությունում:

ՄԱԳԱՏԷ-ն օգտագործում է «երաշխիքներ» տերմինը՝ նկարագրելու այն տեխնիկական միջոցները, որոնք կիրառում է միջուկային նյութերի և միջուկային գործունեության նկատմամբ՝ նպատակ ունենալով կանխել միջուկային զենքի տարածումը՝ նման նյութերի չարաշահման վաղ հայտնաբերման միջոցով: Ավելի քան 200 տեխնիկական սպասարկման անձնակազմի աշխատակիցներ և պահակներ մնացել են Չեռնոբիլի ԱԷԿ-ում Ռուսաստանի կողմից գրավումից հետո՝ 13 օր անընդմեջ աշխատելով: Իրավիճակն անձնակազմի համար «վատթարանում է», հայտնում է ՄԱԳԱՏԷ-ն՝ վկայակոչելով Ուկրաինայի միջուկային կարգավորող մարմնին։

Չգործող կայանը գտնվում է արգելված գոտու ներսում, որտեղ տեղակայված են շահագործումից հանված ռեակտորներ, ինչպես նաև ռադիոակտիվ թափոնների օբյեկտներ:

ՄԱԿ-ի գործակալությունը կոչ է արել Ռուսաստանին՝ թույլ տալ աշխատողներին հերթափոխով աշխատել, քանի որ հանգիստն ու կանոնավոր հերթափոխը շատ կարևոր են ԱԷԿ-ի անվտանգության համար:

«Ես խորապես անհանգստացած եմ Չեռնոբիլի ատոմակայանի անձնակազմի առջև ծառացած բարդ ու սթրեսային իրավիճակով, ինչպես նաև միջուկային անվտանգության համար հնարավոր ռիսկերով»,- ասել է Գրոսսին։

Տաթև Ֆռանգյան