29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Մեծ Բրիտանիան հայտարարել է ՌԴ-ի դեմ նոր ավիացիոն պատժամիջոցների մասին
Քաղաքականություն
09.03.2022 | 14:02
Մեծ Բրիտանիայի ԱԳ նախարար Լիզ Թրասը հայտարարել է, որ երկրի կառավարությունն ավիացիոն պատժամիջոցների նոր փաթեթ է սահմանում ՌԴ-ի դեմ, որը նոր լիազորություններ է տալիս՝ կալանավորելու ռուսական ցանկացած ինքնաթիռ Բրիտանիայում։ Այս մասին տեղեկանում ենք Մեծ Բրիտանիայի կառավարության պաշտոնական կայքից։
Պաշտոնյան նշել է, որ ուժեղացրել են ռուսական օդանավերի թռիչքների և վայրէջքների ներկա արգելքը՝ այսօր սահմանելով նոր կարգ, որը քրեական հանցագործություն է դարձնում ռուսական ցանկացած ինքնաթիռի թռիչքը կամ վայրէջքը Մեծ Բրիտանիայում:
Արգելքը ենթադրում է Ռուսաստանի հետ կապված անձանց կամ կազմակերպություններին պատկանող ցանկացած ինքնաթիռ կալանելու իրավունք:
Նոր լիազորությունները նաև թույլ կտան կառավարությանը Մեծ Բրիտանիայի ինքնաթիռների գրանցամատյանից հանել Ռուսաստանի նշյալ անձանց և կազմակերպություններին պատկանող ինքնաթիռները:
Լրացուցիչ առևտրային սահմանափակող միջոցառումները, որոնք նույնպես ներդրվել են այսօր, կկանխեն Մեծ Բրիտանիայի ավիացիոն կամ տիեզերական արտադրանքի և տեխնոլոգիաների արտահանումը Ռուսաստան, այդ թվում՝ հարակից ծառայությունները, ինչպիսիք են ապահովագրությունը և վերաապահովագրման ծառայությունները:
Լիզ Թրասը նաև նշել է, որ Մեծ Բրիտանիան շարունակելու է աջակցել Ուկրաինային դիվանագիտորեն, տնտեսապես և պաշտպանական ոլորտում, ինչպես նաև աշխատել Ռուսաստանին միջազգային հարթակում մեկուսացնելու ուղղությամբ։
Էմմա Չոբանյան
