Ռուսաստանն արգելել է ռուբլու փոխանակումն արտարժույթով

Արևմտյան պատժամիջոցների հետ կապված երկիր դոլարի հոսքի սահմանափակման պատճառով Ռուսաստանի Բանկը քաղաքացիներին արգելել է կանխիկ արժույթ գնել։ Մինչև սեպտեմբերի 9-ը սահմանված արտարժութային գործարքների նոր ընթացակարգի ներդրման մասին հաղորդագրությունը հրապարակվել է մարտի 8-ի լույս 9-ի գիշերը։ Կանխիկ արժույթը հնարավոր կլինի փոխանակել ռուբլով ցանկացած պահի և ցանկացած ծավալով, փոխանցում է DW-ի ռուսական ծառայությունը։

Բացի այդ, քաղաքացիները կարող են արտարժույթով գումար հանել միայն նախկինում բացված (մինչև մարտի 9-ը) արտարժութային հաշիվներից և ավանդներից ու միայն մինչև 10 հազար դոլարի չափով։ Միաժամանակ, 10 հազար դոլարից ավելի միջոցներ կարելի է ստանալ միայն ռուբլով՝ թողարկման օրվա շուկայական փոխարժեքով։

Արտասահման մեկնելիս կանխիկ գումարի կարիք ունենալու դեպքում՝ ՌԴ քաղաքացիներին Կենտրոնական բանկը խորհուրդ է տալիս վճարել «Միր» քարտով և դրանից կանխիկ գումար հանել ճանապարհորդության երկրի արժույթով։ Տեղեկացվում է, որ ներկայում «Միր» քարտն ընդունվում է Թուրքիայում, Վիետնամում, Հայաստանում, Բելառուսում, Ղազախստանում, Ղրղզստանում, Տաջիկստանում, ինչպես նաև ինքնահռչակ Հարավային Օսիայում և Աբխազիայում։

Հիշեցնենք՝ մարտի սկզբին, որպես Ուկրաինայում ռազմական գործողությունների պատճառով մեկ այլ պատժամիջոցների փաթեթի մաս, Եվրամիությունն արգելել է եվրո թղթադրամների արտահանումը Ռուսաստան և ռուսական յոթ բանկեր անջատել է SWIFT ֆինանսական վճարային համակարգից: Քանի որ ամերիկյան Visa և Mastercard վճարային համակարգերը արգելափակել են ռուսական մի շարք բանկեր, նրանց հաճախորդները չեն կարողանա վճարել Visa և Mastercard քարտերով արտասահմանում, ինչպես նաև գնումներ կատարել արտասահմանյան առցանց խանութներից։

Տաթև Ֆռանգյան