19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ռուսաստանը սպառնում է Եվրոպան զրկել գազից
Քաղաքականություն
08.03.2022 | 12:15
Ռուսաստանն իրավունք ունի Եվրոպան զրկել գազից, իսկ ռուսական նավթի էմբարգոյի դեպքում դրա գինը կարող է ցատկել մինչև 300 դոլարի՝ մեկ բարելի դիմաց։ Այս մասին հայտարարել է ՌԴ փոխվարչապետ Ալեքսանդր Նովակը, գրում է BBC-ի ռուսական ծառայությունը։
«Անհնար է արագ փոխարինել ռուսական նավթի ծավալը եվրոպական շուկայում, դրա համար կպահանջվի ավելի քան մեկ տարի, միևնույն ժամանակ, եվրոպացի սպառողների համար այն շատ ավելի թանկ կլինի։ Այս սցենարով նրանք կդառնան հիմնական զոհը»,- ասել է Նովակը։
Եվրամիությունը հինգշաբթի Ֆրանսիայում կայանալիք ԵՄ անդամ 27 երկրների ղեկավարների գագաթնաժողովում կքննարկի նավթի և գազի էմբարգոյի հարցը։ Առայժմ նման որոշման կայացումը կասկածելի է թվում, քանի որ դեմ է Գերմանիան՝ արդյունաբերական շարժիչը, ամենախիտ բնակեցված երկիրը և Եվրամիության ամենամեծ տնտեսությունը։
«Ներկայում չկա Եվրոպան էներգառեսուրսներով ապահովելու ոչ մի այլընտրանք՝ ջերմության, էլեկտրաէներգիայի ու արդյունաբերության համար»,- ասել է Գերմանիայի կանցլեր Օլաֆ Շոլցը։
Ռուսաստանի դեմ պատժամիջոցների շրջանակում Գերմանիան հրաժարվել է հավաստագրել Ուկրաինան շրջանցող «Հյուսիսային հոսք 2» գազատարը։ Նովակը սպառնացել է հակապատժամիջոցներով։
«Ռուսաստանի հասցեին Եվրոպայում էներգետիկ ճգնաժամի և «Հյուսիսային հոսք 2»-ի նկատմամբ արգելքի կիրառման անհիմն մեղադրանքների կապակցությամբ՝ մենք լիակատար իրավունք ունենք հայելային որոշումներ կայացնել ու էմբարգո սահմանել «Հյուսիսային հոսք 1» գազատարի վրա, որն այժմ 100%-ով ծանրաբեռնված է»,- ասել է ռուս չինովնիկը։
Տաթև Ֆռանգյան
