Ճապոնիան պատժամիջոցներ է սահմանել Ռուսաստանի և Բելառուսի նկատմամբ

Ճապոնիայի կառավարությունն անձնական պատժամիջոցներ է սահմանել ևս 20 ռուսաստանցիների նկատմամբ, որոնք մասնակցում են Ուկրաինա Ռուսաստանի ռազմական գործողությունների կազմակերպմանը, հայտնում է Korrespondent-ը։

Պատժամիջոցային ցուցակները երեքշաբթի՝ մարտի 8-ին հրապարակել է երկրի ԱԳՆ մամուլի ծառայությունը։

Այսպես, «սև ցուցակում» են, մասնավորապես, ՌԴ նախագահի մամուլի քարտուղար Դմիտրի Պեսկովը, նախագահի աշխատակազմի ղեկավարի առաջին տեղակալ Սերգեյ Կիրիենկոն, նախագահի աշխատակազմի ղեկավարի տեղակալ Դմիտրի Կոզակը, Չեչնիայի ղեկավարը Ռամզան Կադիրովը։

Բացի այդ, սահմանափակումների են ենթարկվել ռուս օլիգարխները, այդ թվում՝ Ռոտենբերգ եղբայրները, Գենադի Տիմչենկոն, Ալիշեր Ուսմանովը։ Պատժամիջոցներ են կիրառվել նաև երկու կազմակերպությունների՝ Համացանցային հետազոտությունների գործակալության ու «Վագներ» մասնավոր ռազմական ընկերության նկատմամբ:

Ճապոնիան արգելում է նաև նավթավերամշակման սարքավորումների արտահանումը Ռուսաստան։

Բացի Ռուսաստանի Դաշնությունից՝ պատժամիջոցների տակ են հայտնվել 12 ֆիզիկական անձինք և 10 ընկերություններ ու կազմակերպություններ Բելառուսից։ Ճապոնիայի ԱԳՆ ցուցակում, ի թիվս այլոց, ընդգրկված են Ալեքսանդր Լուկաշենկոյի որդիները՝ Վիկտոր և Դմիտրի Լուկաշենկոները, նրա մամուլի քարտուղար Նատալյա Էյսմոնտը և ՆԳ նախարար Իվան Կուբրակովը։

Միաժամանակ, Տոկիոն արտահանման արգելք է սահմանել Բելառուսի Պաշտպանության նախարարության նկատմամբ։

Տաթև Ֆռանգյան