06.06.2026 | 17:50
Ընտրական հանցագործությունների գործերով ձերբակալվել է 194, քրեական հետապնդման ենթարկվել՝ 209 անձ. ՀԿԿ
Գյումրիում կտրուկ թանկացել է վարձով տրվող բնակարանների գինը․ ՌԴ-ից բնակիչների մեծ հոսք կա քաղաք
Քաղաքականություն
07.03.2022 | 20:57
Վերջին օրերին ՌԴ բնակիչների, հատկապեսъ ծրագրավորողների մեծ հոսք է նկատվում դեպի Գյումրի․ նրանք անորոշ ժամանակով տեղափոխվում են Հայաստան՝ որոշակի համագործակցություն ստեղծելով տեղի ՏՏ ոլորտի ընկերությունների հետ։ Այս մասին Factor.am-ի հետ զրույցում տեղեկացրեց գիշերակացի կազմակերպման ձեռնարկատեր Վարդան Սրտաշյանը, որը նաև Գյումրու կենտրոնում գտնվող հյուրանոցներից մեկի գործադիր տնօրենն է։
Ըստ նրա՝ թեև Հայաստանում ռուսների և բելառուսների շրջանում ամենապահանջված քաղաքը Երևանն է, սակայն Ռուսաստանի բնակիչները նաև Գյումրի են տեղափոխվում։
«Հիմնականում գալիս են ՏՏ ոլորտի մասնագետները, որոնց աշխատանքը կաթվածահար է եղել Ռուսաստանում՝ SWIFT համակարգից բանկերի անջատման պատճառով։ Նրանք հիմնականում գալիս են այստեղ՝ սեփական գումարներն ինչ-որ կերպ կանխիկացնելու, հայկական բանկերում քարտեր հանելու և այդ գումարով առօրյա խնդիրները լուծելու համար։ Իհարկե, ռուբլու փոխարժեքը բավական ընկել է, և նրանց ունեցած խնայողությունները՝ ռուբլու տեսքով, կարելի է ասել, փոշիացել են։ Բայց հիմնականում գործարքներն Արևմուտքի հետ դոլարով են, և պարարտ հող է ստեղծվել Հայաստանում՝ Երևանում, ինչու չէ՝ նաև Գյումրիում ծրագրավորողների համար, նաև այստեղ աշխատանքի անցնելու առումով»,- ասում է Վարդան Սրտաշյանը։
Ըստ մեր զրուցակցի՝ ռուսների հոսքը դեպի Հայաստան պատճառ է դարձել նաև Գյումրիում ինչպես օրավարձով, այնպես էլ ամսավճարով տրվող բնակարանների գների թանկացման։ Եթե մինչ ռուս-ուկրաինական պատերազմը Գյումրիում օրավարձով տրվող 2-3 սենյականոց բնակարանի օրավարձը 10 հազար դրամ էր, հիմա առնվազն 2-3 անգամ թանկացել է։
Այս օրերին Գյումրու կենտրոնում նույնիսկ հազար դոլար ամսավճարով բնակարան է տրվել։ Նման դեպք, ըստ Վարդան Սրտաշյանի, երբեք չի եղել Գյումրու բնակարանային շուկայի պատմության մեջ։
Ըստ նրա՝ գնաճը զսպելու առումով որոշակի անելիք ունի պետությունը։ Պետական միջամտություն, մեր զրուցակցի համոզմամբ, անհրաժեշտ է նաև ավիատոմսերի՝ օր օրի թանկացող գինը զսպելու համար։
Վարդան Սրտաշյանն առաջարկում է ավելացնել չվերթների թիվը։ Ըստ նրա՝ միայն Կրասնոդար-Գյումրի տոմսի արժեքը դարձել է մոտ 1000 դոլար։
Արմիկ Մովսիսյան
