02.03.2026 | 23:40
Հայաստանի մի շարք հասցեներում էլեկտրաներգիայի անջատումներ կլինեն
Ուկրաինացիները չեն գնա Բելառուս՝ հետո ՌԴ մեկնելու․ Ուկրաինայի փոխվարչապետը՝ հումանիտար միջանցքից հրաժարվելու մասին. ՏԵՍԱՆՅՈՒԹ
Քաղաքականություն
07.03.2022 | 13:11
Ուկրաինան մերժել է Ռուսաստանի առաջարկը՝ հումանիտար միջանցքներ կազմակերպել դեպի Ռուսաստանի տարածք։ Այս մասին այսօր հայտարարել է Ուկրաինայի փոխվարչապետ, վերաինտեգրման հարցերով նախարար Իրինա Վերեշչուկը։
«Երեկ՝ ժամը 00:30-ին, մենք նամակ ստացանք Ռուսաստանի Դաշնությունից, որում նրանք առաջարկում էին, հաշվի առնելով Ֆրանսիայի Հանրապետության նախագահ Էմանուել Մակրոնի անձնական խնդրանքը, մարտի 7-ի առավոտյան ժամը 10-ից լռության ռեժիմ հայտարարել և բացել հումանիտար միջանցքներ (Ռուսաստանի Դաշնության ուղղությամբ)։ Սա հումանիտար միջանցքներ բացելու անընդունելի տարբերակ է։ Մերոնք Իվանկովից, Դայմերից, Վիշգորոդից, Կիևի մերձակայքից Բելառուս չեն գնա, որպեսզի հետո ինքնաթիռով թռչեն Ռուսաստանի Դաշնություն։ Հուսով եմ, որ Ֆրանսիայի նախագահը հասկանում է, որ իր անունը և օգնելու անկեղծ փորձերն օգտագործվում են Ռուսաստանի Դաշնության կողմից»,- ասել է Վերեշչուկը:
Նա կոչ է արել քաղաքակիրթ աշխարհին՝ ճնշում գործադրել Ռուսաստանի վրա։
«Մեզ պետք են հումանիտար միջանցքներ: Մենք պետք է դուրս բերենք խաղաղ ուկրաինացիներին և օտարերկրացիներին թեժ գոտիներից: Միայն Ուկրաինայի իշխանությունների կողմից պաշտոնական հաղորդագրություններն են հիմք հանդիսանում ուկրաինական տարածքում հումանիտար միջանցքների աշխատանքի համար»,- ասել է Վերեշչուկը:
«Մենք ներկայացրել ենք մեր տեսլականը, թե ինչպիսին պետք է լինեն մարդասիրական միջանցքները, և պատրաստ ենք այսօր ժամը 10:00-ից բացել այդպիսի միջանցքներ»,- շեշտել է պաշտոնյան։
Նա նշել է, որ Ուկրաինան խնդրում է Ռուսաստանին՝ անհապաղ հաստատել այդ հարցով պատրաստակամությունը և ապահովել հրադադարի ռեժիմի պարտադիր պահպանումը՝ քաղաքացիների կողմից հումանիտար միջանցքների անվտանգ և անարգել անցման համար։
Մանրամասները՝ տեսանյութում
Տաթև Ֆռանգյան
