ԱՄՆ Ներկայացուցիչների պալատն աշխատում է ռուսական նավթի ներկրումն արգելող օրինագծի վրա

ԱՄՆ Ներկայացուցիչների պալատի խոսնակ Նենսի Փելոսին հայտնել է, որ Պալատը դիտարկում է Ռուսաստանին մեկուսացնելու օրենսդրական տարբերակներ, ներառյալ՝ ռուսական նավթի ներկրման արգելքը, գրում է The Hill-ը։

«Մեր օրենքը կարող է արգելել ռուսական նավթի և էներգետիկ ապրանքների ներկրումն ԱՄՆ, չեղյալ հայտարարել նորմալ առևտրային հարաբերությունները Ռուսաստանի և Բելառուսի հետ ու առաջին քայլն անել՝ Ռուսաստանի՝ Առևտրի համաշխարհային կազմակերպություն մուտքը մերժելու համար։ Մենք նաև կարող ենք բարձրացնել ռուսական ներմուծվող ապրանքների մաքսատուրքերը»,- ասել է Փելոսին գործընկերներին ուղղված նամակում։

Ներկայացուցիչների պալատի խոսնակը նաև նշել է, որ նախագահ Բայդենի վարչակազմը 10 միլիարդ դոլար է խնդրել՝ «Ուկրաինային հումանիտար, ռազմական և տնտեսական աջակցության համար» և ասել, որ «Կոնգրեսը մտադիր է այս շաբաթ ընդունել այս արտակարգ ֆինանսավորումը որպես կառավարության ֆինանսավորման մասին մեր օրենսդրության մաս»:

Փելոսին այս մասին խոսել է այն բանից հետո, երբ նախորդ շաբաթ Սենատ է ներկայացվել ռուսական նավթի ներկրումն արգելելու մասին երկկուսակցական օրինագիծ։
Չնայած Ջո Բայդենի վարչակազմը տատանվում էր Ռուսաստանի էներգետիկ ռեսուրսները թիրախավորելու հարցում, Սպիտակ տունն ուրբաթ ազդարարեց, որ նախագահը դիտարկում է քայլեր՝ ռուսական նավթի ներմուծումը նվազեցնելու համար:

Բացի այդ, նախօրեին էլ ԱՄՆ պետքարտուղար Էնթոնի Բլինքենը հայտարարել էր, որ ԱՄՆ-ն ակտիվ քննարկում է ռուսական նավթի ներկրումն արգելելու հնարավորությունը։

Էմմա Չոբանյան