Ըստ Ալիևի` Լաչինն ու Քելբաջարը հավերժ էին մնալու հայկական. Մամիջանյան․ ՏԵՍԱԱՆՅՈՒԹ

«Պատիվ ունեմ» խմբակցության քարտուղար Հայկ Մամիջանյանը, խորհրդարանական ճեպազրույցի ժամանակ անդրադառնալով իշխանության հայտարարությանը, որ իրենք հող չեն հանձնել, նախկին իշխանություններն են բանակցությունները հասցրել այս փուլին, նշեց. «Իշխանությանը թվում է, մենք հոգնելու ենք ճշմարտությունը հնչեցնել, իշտահներիդ քացախ: Բանակցությունների ընթացքը կապիտուլյացիայի արդյունքում հողեր հանձնելու հետ համեմատելը ոնց որ կողոպուտը համեմատես պայմանավորվածության հետ: ՀՀ հիմնական բանակցությունները, մինչև Փաշինյանը, եղել են ոչ թե ինչ-որ բան տալու, այլ ստանալու մասին… Ստիպված եմ մեջբերել Ալիևի խոսքը, որ, ըստ պայմանավորվածությունների, Լաչինն ու Քելբաջարը հավերժ մնալու էին հայկական… Սեփական ապիկարությունը քողարկելը, «Փաշինյանի գրպանը գցեցին» թեզով, իրենց համար աշխատելաոճ է»:

Մամաիջանյանի խոսքով՝ հակառակորդ պետության ղեկավարի հնչեցրած հայտարարությունները ևս Հայաստանի իշխանությունների ապիկարության արդյունքն է։ «Մենք չենք կարողանում մեր ճշարտությունը բարձրաձայնել աշխարհում, չենք կարողանում աշխարհի համար ընկալելի լեզվով բարձրաձայնել այլ վայրագությունները, որոնք իրականացվել են Արցախի ժողովրդի հանդեպ, և հնարավորություն ենք տալիս թշնամուն կեղծիք ու սուտ տարածել»,- նշեց պատգամավորը։

Նա հիշեցրեց, որ ՀՀ ԱԳ նախարար Արարատ Միրզոյանն ԱԺ ամբիոնից այդպես էլ չբարձրաձայնեց, որ Շուշին և Հադրութը օկուպացված տարածքներ են: «Մենք ունենք մի իրավիճակ, երբ ՀՀ ԱԳ նախարարը Ազգային ժողովի ամբիոնից չի բարձրաձայնում, որ Շուշին և Հադրութը օկուպացված են։ Հավանաբար իր և Չավուշօղլուի ընկերական կամ իր և իր ադրբեջանցի գործընկերոջ չգիտեմ ինչպիսի հարաբերությունները չփչացնելու համար։ Այլ բացատրություն ես այստեղ չեմ գտնում։ Եվ հենց նմանօրինակ վախվորած հակահայկական արտաքին քաղաքականության արդյունքում թշնամու համար հնարավորություն է ստեղծվում նախահարձակ լինել և կեղծ մեղադրանքներ հնչեցնել»,- ասաց Մամիջանյանը։

Մանրամասները՝ տեսանյութում: