29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Հռոմի պապը կոչ է արել դադարեցնել Ուկրաինայում ռազմական գործողությունները և մարդասիրական միջանցքներ բացել
Քաղաքականություն
07.03.2022 | 20:23
Հռոմի պապ Ֆրանցիսկոսը կոչ է արել դադարեցնել զինված հարձակումն Ուկրաինայում, որպեսզի ողջախոհությունը հաղթի, ինչպես նաև երաշխավորվի մարդասիրական միջանցքները։ Ըստ Vatican News-ի՝ Հովվապետն այս մասին հայտարարել է ուխտավորների հետ կիրակնօրյա հանդիպման ժամանակ։
«Ուկրաինայում արյան և արցունքների գետեր են հոսում. սա սոսկ ռազմական գործողություն չէ, այլ մահ, ավերածություն և աղքատություն սերմանող պատերազմ։ Գնալով ավելանում են զոհերը, ինչպես նաև փախստականները, հատկապես՝ երեխաներ ունեցող մայրերի շրջանում։ Այս բազմաչարչար երկրում մարդասիրական աջակցության կարիքը կտրուկ աճում է ժամ առ ժամ»,- ասել է Ֆրանցիսկոս պապը։
«Ես ջերմեռանդ կոչ եմ անում, որպեսզի հումանիտար միջանցքներն իսկապես ապահովվեն, և որ շրջափակման մեջ գտնվող տարածքներում մեր եղբայրներին ու քույրերին, որոնք ճնշված են ռումբերով և վախով, օգնությունը երաշխավորվի և դյուրացվի», – ընդգծել է կաթոլիկ Հովվապետը:
Ֆրանցիսկոս պապը շնորհակալություն է հայտնել բոլոր նրանց, ովքեր ընդունում են փախստականներին Ուկրաինայից, և կոչ է արել բանակցություններ վարել։ Նա նաև հայտնել է, որ երկու կարդինալներ են ուղարկվել Ուկրաինա՝ կարիքավորներին օգնություն հասցնելու համար։
Տաթև Ֆռանգյան
