Ինչ վիճակ է Զապորոժիեի ատոմակայանում․ Զելենսկին ասում է՝ սա կարող է լինել Եվրոպայի վերջը․ ՏԵՍԱՆՅՈՒԹ

Ռուս-ուկրաինական պատերազմի 9-րդ օրվա գիշերը կարող էր աղետալի դառնալ ողջ Եվրոպայի համար։ Ըստ ուկրաինական կողմի՝ ռուսական զորքերը գնդակոծել են Եվրոպայում ամենամեծ՝ Զապորոժիեի ատոմակայանը։ Հարձակման հետևանքով հրդեհ է բռնկվել էներգաբլոկներից մեկի մոտ և ուսումնական շենքում։

Ուկրաինայի արտակարգ իրավիճակների պետական ծառայությունը հայտնում է, որ հրդեհի ընդգրկած տարածքը կազմել է 2000 քմ, այն հաջողվել է տեղայնացնել, հետո՝ մարել։ Ուկրաինական կողմն ԱԷԿ-ում ճառագայթային ֆոնի փոփոխություն չի գրանցել։ Այդուհանդերձ, Զելենսկին  հերթական ուղերձում խոսել է  գլոբալ աղետի վտանգի մասին։

«Զապորոժիեի ԱԷԿ-ում 6 էներգաբլոկ է, եթե պայթեց, դա կլինի Եվրոպայի վերջը։ Եվրոպան հիմա պետք է արթնանա. Այրվում է Եվրոպայի ամենամեծ ատոմակայանը։ Ռուսաստանը նպատակ ունի կրկնել Չեռնոբիլի աղետը, և Մոսկվան զբաղվում է միջուկային ահաբեկչությամբ։ Ռուսական տանկերը կրակել են միջուկային ենթակառուցվածքների վրա», – ասել է նա։

Իրավիճակին  արձագանքել է Մեծ Բրիտանիայի վարչապետ Բորիս Ջոնսոնը։ Նա հեռախոսազրույց է ունեցել Զելենսկու հետ, ինչից հետո հայտարարել է, որ ՌԴ նախագահ Պուտինի անխոհեմ գործողություններն այժմ կարող են ուղղակիորեն սպառնալ ողջ Եվրոպայի անվտանգությանը։

«Մեծ Բրիտանիան հնարավոր ամեն բան կանի, որպեսզի իրավիճակն էլ ավելի չվատթարանա։ Հրադադարը կարևոր է, Ռուսաստանը պետք է անհապաղ դադարեցնի գրոհը էլեկտրակայանի վրա և թույլ տա արտակարգ իրավիճակների ծառայություններին անարգել մուտք գործել կայան: Մտադիր եմ առաջիկա ժամերին ՄԱԿ-ի Անվտանգության խորհրդի արտահերթ նիստ հրավիրել»։

Մանրամասները՝ տեսանյութում։

Ռոզա Վարդանյան