16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
ՆԱՏՕ-ն Ուկրաինայի հակամարտության կողմ չէ․ Ստոլտենբերգ
Քաղաքականություն
04.03.2022 | 14:42
Հյուսիսատլանտյան դաշինքի (ՆԱՏՕ) գլխավոր քարտուղար Յենս Ստոլտենբերգը հայտարարել է, որ Դաշինքը Ուկրաինայի հակամարտության կողմ չէ և չի ձգտում պատերազմի Ռուսաստանի հետ։
Ինչպես հաղորդում է UNIAN-ի թղթակիցը, Ստոլտենբերգն այս մասին ասել է ԱՄՆ պետքարտուղար Էնթոնի Բլինկենի հետ Բրյուսելում ՆԱՏՕ-ի ԱԳ նախարարների հանդիպմանն ընդառաջ համատեղ մամուլի ասուլիսում։
Գլխավոր քարտուղարի խոսքով՝ այսօր Դաշինքի երկրների արտաքին գործերի նախարարները կհանդիպեն՝ խորհրդակցելու և համակարգելու Ուկրաինա Ռուսաստանի բացահայտ ներխուժման և դրա հեռահար հետևանքների արձագանքը։
«Մենք դատապարտում ենք հարձակումները խաղաղ բնակչության վրա, գիշերը ականատես եղանք նաև ատոմակայանի վրա հարձակման մասին հաղորդումների: Սա ցույց է տալիս այս պատերազմի հանդգնությունը, այն դադարեցնելու, Ռուսաստանի բոլոր ուժերը դուրս բերելու և դիվանագիտական ջանքերին բարեխղճորեն մասնակցելու կարևորությունը»,- ընդգծել է Ստոլտենբերգը։
Գլխավոր քարտուղարը հավելել է, որ անդամ երկրները աննախադեպ պատժամիջոցներ են սահմանել Ռուսաստանի դեմ և աջակցություն են ցուցաբերում Ուկրաինային։
«Միևնույն ժամանակ, ՆԱՏՕ-ն հակամարտող կողմ չէ, ՆԱՏՕ-ն պաշտպանական դաշինք է: Մենք չենք ցանկանում ռազմական հակամարտություն Ռուսաստանի հետ, բայց միևնույն ժամանակ մենք պետք է ապահովենք, որ թյուրիմացություն չլինի պաշտպանվելու և մեր բոլոր դաշնակիցներին պաշտպանելու վճռականության վերաբերյալ, այդ պատճառով էլ մենք մեծացրել ենք ՆԱՏՕ-ի ուժերի ներկայությունը դաշինքի արևելյան հատվածում, սա պաշտպանական ներկայություն է»,- ընդգծել է Ստոլտենբերգը։
Տաթև Ֆռանգյան
