18.08.2026 | 16:56
Դնեպրոպետրովսկի մարզի 16 բնակավայրերից երեխաներով ընտանիքները հարկադիր տարհանվում են
Բայդենն ասում է՝ Պուտինը գաղափար չունի, ինչ է իրեն սպասվում․ Аpple-ը ՌԴ-ում ապրանք չի վաճառի․ ՏԵՍԱՆՅՈՒԹ
Քաղաքականություն
02.03.2022 | 15:17
Ուկրաինայում ռազմական գործողությունները շարունակվում են արդեն 1 շաբաթ․ փետրվարի 28-ին տեղի ունեցած ռուս-ուկրաինական բանակցությունները որևէ էական արդյունքի չհանգեցրին։ Այսօր նախատեսված էր բանակցությունների հաջորդ փուլը, սակայն ըստ, «Ինտեֆաքս»-ի, հանդիպումը կարող է տեղափոխվել շաբաթվա վերջ։ Մինչ այդ, ռուսական զորքերը շարունակում են առաջխաղացումը․ ըստ ուկրաինական լրատվամիջոցների՝ հրթիռակոծվում են նաև խաղաղ բնակավայրերը։
Ժիտոմիր քաղաքում հրթիռն ընկել է բնակելի շենքի վրա։ Փրկարարները 12 մարդու դուրս են բերել մասամբ փլուզված շենքի նկուղներից, նրանցից 6-ը երեխաներ են։ Ուկրաինայի Արտակարգ իրավիճակների պետական ծառայության տվյալներով՝ Ժիտոմիրում ավիահարվածի հետևանքով զոհվել է 2 մարդ, ևս 16-ը՝ վիրավորվել։ Փրկարարական աշխատանքները շարունակվում են։
Երեկ երեկոյան թիրախավորվել է նաև Կիևի հեռուստաաշտարակը։ Ռադիոհեռարձակման, ռադիոկապի և հեռուստատեսության ուկրաինական կոնցեռնը տեղեկացրել է, որ տեղի ունեցած պայթյունների հետևանքով վնասվել է տեխնիկական սենյակը, իսկ ալիքների հեռարձակումը ժամանակավորապես դադարեցված է։
ՌԴ գլխավոր դատախազությունը «Ռոսկոմնադզոր»-ից պահանջել է սահմանափակել «Էխո Մոսկվի»-ի և «Դոժդ» հեռուստաալիքի հասանելիությունը՝ պնդելով, որ դրանք Ռուսաստանում ճանաչվել են որպես օտարերկրյա գործակալներ։ Ըստ հաղորդագրության՝ այս լրատվամիջոցներին վերագրվում է կեղծ տեղեկությունների նպատակային և համակարգված տարածում, և եթե խախտումները չվերացվեն, լրատվամիջոցներին սպառնում է արգելափակում։
ԱՄՆ նախագահ Ջո Բայդենը նախօրեին ժողովրդին ուղղված իր ուղերձում հայտարարել է, որ ՌԴ նախագահ Վլադիմիր Պուտինն իր հաշվարկներում սխալվել է։ Նրա դիտարկմամբ՝ Պուտինը գաղափար չունի, թե ինչ է իրեն սպասվում։ Նախագահը թեև կրկին շեշտել է, որ իրենց ուժերը չեն ներգրավվի Ուկրաինայում ռուս զինվորականների հետ հակամարտության մեջ և չեն գնա Եվրոպա Ուկրաինայում կռվելու, բայց նրանք կպաշտպանեն ՆԱՏՕ-ի իրենց դաշնակիցներին։ Բայդենը խոսել է նաև նոր պատժամիջոցներից՝ հայտնելով, որ ԱՄՆ-ը ևս փակում է իր օդային տարածքը ռուսական ընկերությունների համար։
Մանրամասները՝ տեսանյութում։
Ռոզա Վարդանյան
