15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Ֆինլանդիայի խորհրդարանը կքննարկի երկրի՝ ՆԱՏՕ-ին հնարավոր անդամակցության հարցը
Քաղաքականություն
01.03.2022 | 15:15
Ուկրաինայում ռազմական գործողությունների ֆոնին Ֆինլանդիան ավելի քան երբևէ մոտեցել է ՆԱՏՕ-ին։ Այս մասին գրում է POLITICO-ն։
Նշվում է, որ Ֆինլանդիայի քաղաքական կուսակցություններն այսօր հավաքվելու են՝ քննարկելու Ռուսաստանի հարձակումն Ուկրաինայի վրա և Ֆինլանդիայի դերը Եվրոպայում նոր ուժերի հավասարակշռության մեջ: Ֆինլանդիայի պոտենցիալ անդամակցությունը ՆԱՏՕ-ին նույնպես լինելու է քննարկման առարկա, լրագրողների հետ զրույցում ասել է երկրի վարչապետ Սաննա Մարինը։
Հելսինկիում տրամադրությունը լարված է։ Ֆինլանդիան ունի Եվրոպայի ամենաերկար սահմանը Ռուսաստանի հետ՝ ավելի քան 1300 կիլոմետր, բայց ռազմական դաշինքի մաս չի կազմում: Երկիրը ՆԱՏՕ-ի մերձավոր դաշնակիցն է, սակայն ակումբին միանալու ցանկությունը մինչ այժմ մեծ չէր։
«Հասկանալի է, որ շատ ֆիններ փոխել կամ փոխում են իրենց կարծիքն այն բանից հետո, երբ Ռուսաստանը պատերազմ սկսեց Ուկրաինայի դեմ։ Ֆինները գնահատում են, թե որն է այն գիծը, որով անցել է Ռուսաստանը, և որն է այն սահմանը, որը Ռուսաստանը չի անցնի։ Եվ եթե Ռուսաստանը հատում է ինչ-որ գիծ, մենք դրան միայնա՞կ ենք բախվում, թե՞ մյուսների հետ միասին»,- ասել է Մարինը՝ չներկայացնելով իր կարծիքը ՆԱՏՕ-ին անդամակցության վերաբերյալ։
Ֆիննական Yle հեռարձակող ընկերության կողմից անցկացված հարցումը ցույց է տվել, որ ֆինների 53 տոկոսը կողմ է ՆԱՏՕ-ին երկրի անդամակցությանը։ Այս ցուցանիշը հասնում է 66 տոկոսի, եթե հարևան Շվեդիան նույնպես անդամակցի ՆԱՏՕ-ին: Սա հանրային վերաբերմունքի կտրուկ փոփոխություն է։ Նախորդ՝ 2017-ի հարցման ժամանակ ֆինների միայն 19 տոկոսն էր աջակցել ՆԱՏՕ-ին անդամակցությանը:
ՆԱՏՕ-ին անդամակցության շուրջ հանրաքվե անցկացնելու վերաբերյալ քաղաքացիների նախաձեռնությունն էլ մեկ շաբաթից պակաս ժամանակում հավաքել է անհրաժեշտ 50,000 ստորագրությունը, ինչը ստիպում է խորհրդարանին՝ քննարկել հարցը:
Էմմա Չոբանյան
