Անկարան չի ճանաչում ՌԴ-ի գործողությունները Ուկրաինայի տարածքային ամբողջականության դեմ․ Հուլուսի Աքար

Թուրքիայի պաշտպանության նախարար Հուլուսի Աքարը հայտարարել է, որ նեղուցների կարգավիճակի մասին Մոնտրոյի կոնվենցիայի արհամարհումը որևէ երկրի օգուտ չի բերի, գրում է «Անադոլու» գործակալությունը։

«Թուրքիան կշարունակի խստորեն պահպանել կոնվենցիայի բոլոր պահանջները նեղուցների մասով, այդ թվում` այդ փաստաթղթի 19, 20 և 21 կետերը»,- ասել է Աքարը լրագրողների հետ զրույցում։

Մեկնաբանելով Ուկրաինայում տիրող իրավիճակը՝ թուրք նախարարը նշել է, որ ինչպես Ուկրաինան, այնպես էլ ՌԴ-ն Թուրքիայի համար հարևան երկրներ են, որոնց հետ Անկարան դրական կապեր է զարգացնում։

«Մենք անհանգստությամբ ու մտահոգությամբ ենք հետևում գործընթացներին։ Լրջորեն անհանգստացած ենք մարդկանց մահերով։ Թուրքիան հարգել ու հարգում է հարևան բոլոր երկրների ինքնիշխանությունը, սահմաններն ու ամբողջականությունը։ Մենք այդ սկզբունքից չենք հրաժարվում նաև Ուկրաինայի դեպքում։ Հուսով ենք՝ շուտափույթ խաղաղություն ու խնդիրների լուծում դիվանագիտական ճանապարհով»,- ասել է Աքարը։

Նա նաև նշել է, որ Անկարան չի ճանաչում ռուսական կողմի գործողությունները Ուկրաինայի ինքնիշխանության ու տարածքային ամբողջականության դեմ։

«Մենք տեսնում ենք ու խոսում գործողությունների մասին, որոնք հակասում են միջազգային իրավունքի նորմերին։ Թուրքիան պատրաստ է բոլոր ջանքերը գործադրել հումանիտար դրամայից դուրս գալու համար»,- ասել է Հուլուսի Աքարը՝ նշելով, որ Թուրքիան ողջունում է ստեղծված իրավիճակից դիվանագիտական ​​և քաղաքական ելքերի ցանկացած ջանքերը։

«Մոնտրոյի կոնվենցիան երկար տարիներ հաջողությամբ գործում է ափամերձ բոլոր պետությունների համար։ Ստատուս քվոյի փոփոխությունն ու կոնվենցիայի արհամարհումն օգուտ չի բերի ոչ մի կողմի։ Թվում է, որ բոլոր կողմերը պետք է խստորեն պահպանեն այս փաստաթղթի պայմանները։ Թուրքիան հանդես է գալիս Սևծովյան տարածաշրջանում խաղաղության և կայունության օգտին»-ասել է Թուրքիայի ՊՆ ղեկավարը։

Նա նաև անընդունելի է համարել Սև ծովի տարածաշրջանի վերածումը մրցակցության գոտու։

Էմմա Չոբանյան