Լուկաշենկոն հավաստիացրել է, որ Բելառուսի տարածքից զորքեր չեն մտնի Ուկրաինա․ Զելենսկի

Ուկրաինայի նախագահ Վլադիմիր Զելենսկին հեռախոսազրույց է ունեցել Բելառուսի նախագահ Ալեքսանդր Լուկաշենկոյի հետ։ Զելենսկին․ մեկնաբանելով Բելառուսի նախագահ Ալեքսանդր Լուկաշենկոյի հետ զրույցը,  հայտարարել է, որ այն երկար և առարկայական է եղել, ընդ որում, Լուկաշեկնոն հավաստիացրել է, որ Բելառուսի տարածքից հրթիռներ չեն թռչի և զորքեր չեն մտնի Ուկրաինա:

«Ես հեռախոսազրույց եմ ունեցել Ալեքսանդր Լուկաշենկոյի հետ։ Մենք նրա հետ երկու տարի չենք խոսել։ Իսկ այսօր ես նրա հետ շատ առարկայական եմ խոսել։ Ես մանրամասն բացատրեցի նրան մեր բախման անհնարինությունը։ Ես չեմ ուզում, որ հրթիռները, ինքնաթիռներն ու ուղղաթիռներն Ուկրաինա թռչեն Բելառուսից։ Ես չեմ ուզում, որ Բելառուսից զորքեր գնան Ուկրաինա։ Եվ նա ինձ հավաստիացրել է դրանում», – Interfax-ի ուկրաինական ծառայության փոխանցմամբ՝ հայտարարել է Զելենսկին նախագահի գրասենյակում կայացած ճեպազրույցի ժամանակ։

Ավելի վաղ Ուկրաինայի ներքին գործերի նախարարի խորհրդական Անտոն Գերաշչենկոն իր Telegram-ի ալիքում հայտնել էր, որ Բելառուսի տարածքից Ուկրաինայի ուղղությամբ Իսկանդերներ են արձակվել։

Փետրվարի 24-ին ՌԴ նախագահ Վլադիմիր Պուտինը հայտարարել է Ուկրաինայում հատուկ ռազմական գործողության մասին՝ ի պատասխան Դոնբասի հանրապետությունների ղեկավարների օգնության դիմումի։ Դրանից հետո ԱՄՆ-ը, ԵՄ-ն, Մեծ Բրիտանիան, ինչպես նաև մի շարք այլ երկրներ հայտարարել են, որ պատժամիջոցներ են սահմանում ռուս ֆիզիկական և իրավաբանական անձանց դեմ։

Գերտերությունները նոր պատժամիջոցներ են ընդունել, ըստ որոնց՝ ռուսական բանկերը կանջատվեն SWIFT համակարգից։

Ավելի վաղ ռուսական ավիաընկերությունների համար իրենց օդային տարածքն են փակել Սլովակիան, Լատվիան, Լիտվան, Ռումինիան, Չեխիան, Լեհաստանը և Կանադան։ «Ռոսավիացիան» ի պատասխան սկսել է փակել Ռուսաստանի օդային տարածքը այս երկրների ավիաընկերությունների համար։

Եվրամիությունն ամբողջությամբ փակում է իր երկրների օդային տարածքը ռուսական ինքնաթիռների համար. այս մասին այսօր՝ փետրվարի 27-ին, Բրյուսելում կայացած մամուլի ասուլիսում հայտարարել է Եվրահանձնաժողովի (ԵՀ) ղեկավար Ուրսուլա ֆոն դեր Լեյենը։