16.09.2026 | 23:05
Բաքուն ՀՀ-ի հետ կապերի մեջ մեղադրվող բանտարկված թալիշ ակտիվիստին 3 տարով կտեղափոխի խիստ ռեժիմի բանտ
Կրեմլը պնդում է, որ Կիևը հրաժարվել է Մոսկվայի հետ բանակցություններից
Քաղաքականություն
26.02.2022 | 17:32
Կրեմլի խոսնակ Դմիտրի Պեսկովը հայտարարել է, որ ուրբաթ կեսօրին, Կիևի հետ սպասվող բանակցությունների հետ կապված, ՌԴ նախագահ Վլադիմիր Պուտինը կարգադրել է դադարեցնել զորքերի առաջխաղացումը Ուկրաինայում, սակայն Կիևի կողմից բանակցություններից հրաժարվելու պատճառով այսօր կեսօրին ռուսական զորքերը վերսկսել են տեղաշարժը, գրում է ՏԱՍՍ-ը։
«Երեկ կեսօրին, Ուկրաինայի ղեկավարության հետ սպասվող բանակցությունների կապակցությամբ, Ռուսաստանի նախագահը և գերագույն գլխավոր հրամանատարը հրամայել է դադարեցնել ռուսական զորքերի հիմնական ուժերի առաջխաղացումը»,- ասել է Կրեմլի խոսնակը։
Նա պարզաբանել է, որ քանի որ «ուկրաինական կողմը հրաժարվել է բանակցություններից, ռուսական հիմնական ուժերի առաջխաղացումը վերսկսվել է այսօր կեսօրին՝ գործողության պլանին համապատասխան»։
Պաշտոնական Կիևն առայժմ չի մեկնաբանել բանակցություններից հրաժարվելու մասին հայտարարությունը։
Հիշեցնենք՝ Զելենսկին մի քանի անգամ բանակցություններ վարելու կոչով դիմել է Պուտինին։ Մասնավորապես, իր ուղերձներից մեկում ելույթ ունենալով ռուսերեն՝ Զելենսկին ասել է. «Ուզում եմ ևս մեկ անգամ դիմել Ռուսաստանի Դաշնության նախագահին։ Մարտեր են ընթանում ամբողջ Ուկրաինայում։ Եկեք նստենք բանակցությունների սեղանի շուրջ»։
Տաթև Ֆռանգյան
