10.08.2026 | 18:29
Ուկրաինայի դատարանը փոխել է Զելենսկիի գրասենյակի նախկին ղեկավարի խափանման միջոցը․ նրան թույլատրվել է այցելել մի քանի մարզեր
Ընդդիմադիր պատգամավորն ի տարբերություն ՀՀԿ-ականի, չի պատասխանում քաղաքական հարցին. ՏԵՍԱՆՅՈՒԹ
Քաղաքականություն
19.04.2018 | 22:43
Նախկին ոստիկանապետ Ալիկ Սարգսյանը «Քայլ արա մերժիր Սերժին» շարժման դեմ ոստիկանության վերջին օրերի գործողություններում որևէ անօրինականություն չի տեսնում։ Ցուցարարների դեմ «Զարյա» տեսակի լուսաձայնային նռնակների կիրառումը նա համարում է հատուկ միջոց։ Սակայն հայտնի է, որ այդ հատուկ միջոցը վիրավորել է 46 մարդու: «Լավ կլիներ, որ վիրավորներ չլինեին»,- ասում է ՀՀԿ-ական պատգամավորը։
Նա ուրիշ տեղեկություններ չունի Բաղրամյան փողոցում տեղի ունեցածից։ ՀՀԿ-ական պատգամավոր Կարինե Աճեմյանը Նիկոլ Փաշինյանին կոչ է անում վերադառնալ խորհրդարան և այստեղի ամբիոնից խոսել իր ընտրողների հետ։ Հենց դրա համար են նրան տվել պատգամավորի մանդատը: «Ես ուղիղ եթերում տեսա, թե նա ինչպես արտահայտվեց իր պատգամավորական վկայականի մասին, որն իբրև թե կորցրել է, և ինքը դա չի արժևորում։ Ի՞նչ անենք որ կորցրել է»,- ասում է տիկին Աճեմյանը։
Առայժմ Հանրապետական խմբակցությունը չի քննարկում Փաշինյանին պատգամավորական անձեռնմխելիությունից զրկելու հարցը, համենայնդեպս, տիկին Աճեմյանը նման տեղեկություններ չունի: «Դա գործընթաց է, որն իրականացվում է ԱԺ ղեկավարության կողմից՝ պարզելով և վերլուծելով որոշակի գործընթացներ, դա իմ կոմպետենցիայի մեջ չի մտնում»,- մանրամասնում է իշխանական պատգամավորը։
Ընդդիմադիր պատգամավոր Արտակ Զեյնալյանը քաղաքական հարցերին չի պատասխանում։ Մասնավորապես, նա անպատասխան թողեց այն հարցը, թե ի՞նչ են մտածում «Ելք»-ում Հայաստանում ստեղծված վիճակից դուրս գալու մասին: «Ես կօգտվեմ իմ ազատության իրավունքից և չեմ ընկնի ձեր ծուղակը»,- լրագրողին ասում է ընդդիմադիր պատգամավորը։
Փոխարենը պարոն Զեյնալյանը կասի, որ «Քայլ արա մերժիր Սերժին» շարժման բերման ենթարկված բոլոր քաղաքացիների իրավունքները խախտված են։ Պատգամավորն ինքը ծեծի հետքեր է տեսել բերման ենթարկվածների վրա: «Ոստիկանն իրավունք չունի ցուցարարին ծեծել»,- եզրակացնում է պատգամավորը։
