15.12.2025 | 11:22
Ծիծեռնակաբերդի խճուղու հիմնական փլուզված հատվածը վերականգնվել է․ քաղաքապետարանի պաշտոնյա. ՏԵՍԱՆՅՈՒԹ
Առանց տնտեսության վերականգնման՝ Էրդողանը պարտություն կկրի ընտրություններում․ թուրք տնտեսագետ
Քաղաքականություն
21.02.2022 | 23:31
Թուրքիայի նախագահ Ռեջեփ Թայիփ Էրդողանը հաջորդ ընտրություններում պարտություն կկրի, եթե չկարողանա նշանակալի ու կայուն կերպով վերականգնել երկրի հիվանդ տնտեսությունը։ Նման կարծիք է հայտնել տնտեսագետ Աթիլլա Յեշիլադան, գրում է «Ահվալ»-ը։
Գնահատելով վերջին հարցումները, որոնք ցույց են տալիս, որ Թուրքիայի իշխող դաշինքը կորցնում է աջակցությունը, Յեշիլադան ասել է, որ Էրդողանի իշխող «Արդարություն և զարգացում»-ը (AKP) և նրա ծայրահեղ աջ դաշնակից «Ազգայնական շարժում» կուսակցությունը (MHP) «սխալ են կարդում երկիրը և հաջորդ ընտրությունները ուղի են հարթելու երկրում քաղաքական փոփոխությունների համար»։
Թուրքիայի քաղաքացիներն այժմ պայքարում են երկրում վերջին գրեթե երկու տասնամյակի ամենաբարձր գնաճի դեմ։ Բացի այդ, հունվարից թանկացել են բնական գազն ու էլեկտրաէներգիան, ինչը երկրում բողոքի ակցիաների պատճառ է դարձել։ Թուրքական լիրան էլ 44 տոկոսով արժեզրկվել է։
«Ես ամեն հարթակում ասում եմ, որ միակ փոփոխականը, որը կորոշի Էրդողանի՝ ընտրություններում հաղթելու շանսերը, բնակչության հայացքն է տնտեսությանը։ Հարցումների մասնակցողների մի զգալի մասը Էրդողանին կամ նրա կառավարությանը համարում է երկրի վատ տնտեսական հետագծի պատասխանատուն»,- ասել է տնտեսագետը։
Էրդողանի ներկա վարկանիշը ընտրողների շրջանում, համավարակի մեկնարկից ի վեր, գրեթե 56 տոկոսից նվազել է 38,6 տոկոսի։ Այս ամսվա սկզբին Metropoll-ի հրապարակված հարցման համաձայն՝ Թուրքիայի կեսն իր աջակցությունն է հայտնում ընդդիմադիր դաշինքին, որն ունի 42 տոկոսից մի փոքր պակաս աջակցություն։
«Հաջորդ ընտրությունները ոչ միայն ճանապարհ են հարթելու Թուրքիայում քաղաքական փոփոխությունների համար, դրանք ստեղծելու են երկրաշարժ ուղեղներում»,- ասել է Յեշիլադան։
Հավելենք, որ Թուրքիայում նախագահական և խորհրդարանական ընտրությունները նախանշված են 2023թ․ հունիսին։
Էմմա Չոբանյան
