21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
Թուրքիան աջակցում է Թբիլիսիի՝ ՆԱՏՕ-ին անդամակցելու ցանկությանը
Քաղաքականություն
21.02.2022 | 21:23
Թուրքիան աջակցում է Թբիլիսիի եվրաատլանտյան կուրսին և ՆԱՏՕ-ին անդամակցելու երկրի ցանկությանը։ Թբիլիսիում վրաց գործընկեր Շալվա Պապուաշվիլիի հետ բանակցությունների ժամանակ այս մասին հայտարարել է Թուրքիայի Ազգային մեծ ժողովի նախագահ Մուսթաֆա Շենթոփը, գրում է EADaily-ն։
Շենթոփը նշել է, որ Անկարան բոլոր հարթակներում հայտարարում է «Վրաստանի ինքնիշխանությանը և տարածքային ամբողջականությանը ուժեղ աջակցության» մասին։ Թուրքիայի խորհրդարանի խոսնակը Վրաստանն անվանել է «բարեկամ պետություն, ռազմավարական գործընկեր եւ դաշնակից, որի հետ Թուրքիան խնդիրներ չունի»։
Պապուաշվիլին իր հերթին շնորհակալություն է հայտնել Անկարային՝ տարածաշրջանային անվտանգության ամրապնդման գործում ներդրած ավանդի համար։
«Շատ կարևոր է միմյանց աջակցել դժվարին օրերին»,- ընդգծել է Վրաստանի խորհրդարանի նախագահը։
Շենթոփի և Պապուաշվիլիի բանակցություններից հետո ստորագրվել է միջխորհրդարանական համագործակցության հնգամյա արձանագրություն։
Հավելենք, որ Մուսթաֆա Շենթոփը պաշտոնական այցով Թբիլիսիում է։ Վրաստանի արտգործնախարարության մամուլի ծառայության հաղորդմամբ, Թբիլիսի կատարած այցի ընթացքում Շենթոփը կհանդիպի նաև նախագահ Սալոմե Զուրաբիշվիլիի և վարչապետ Իրակլի Ղարիբաշվիլիի հետ։
Տաթև Ֆռանգյան
