Սամվել Բաբայանը պատերազմի ժամանակ «բունկերում» է եղել. ինչպես և ինչ է բացահայտելու քննիչ հանձնաժողովը. ՏԵՍԱՆՅՈՒԹ

Այսօր տեղի ունեցավ 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի վերջին նիստը, որին լրագրողները մասնակցելու հնարավորություն ունեին․ այսուհետ նիստերը կանցկացվեն դռնափակ: Հանձնաժողովի նախագահ Անդրանիկ Քոչարյանը հույս հայտնեց, որ փակ դռների հետևում կկարողանան անթերի աշխատանք կատարել՝ չնայած խորհրդարանական ընդդիմության բացակայությանը:

Հիշեցնենք՝ ԱԺ «Հայաստան» և «Պատիվ ունեմ» խմբակցությունները բոյկոտում են հանձնաժողովի աշխատանքները, դրա մասին ավելի վաղ էին հայտարարել` հիմնավորելով, թե իշխանությունները չեն կարող օբյեկտիվ քննել իրենց իսկ գործողությունները: Իսկ ահա այսօր նիստին, իշխանական պատգամավորներից զատ, ներկա էր նաև 44-օրյա պատերազմի օրերին Արցախի ԱԽ քարտուղարի պաշտոնը զբաղեցրած Սամվել Բաբայանը: Նրա մասնակցության հետ կապված քննադատություններ կան: Հարցեր են հնչում, թե ինչպես է պատերազմի ժամանակ առանցքային պաշտոն զբաղեցրած Բաբայանը քննելու պատերազմի հանգամանքներն ու բացահայտելու մեղավորներին:

Սամվել Բաբայանը վստահեցնում է՝ իրեն Արցախի ՊԲ-ից գրություն են ուղարկել և տեղեկացրել, որ իրավունք չունի մարտական գործողություններին միջամտել: Սակայն Բաբայանը նշեց, որ պատերազմի ամբողջ ընթացքում մարտերը կառավարող բունկերում ազատ ելումուտ է արել․ «Արցախի նախագահի կողմից գործուղվել եմ այնտեղ, հետո զեկուցել եմ, թե ինչ է կատարվում: Ես ո՛չ խառնվել եմ, ո՛չ էլ խոսել եմ, ձեր նման այսպես կանգնել եմ»։

Ընդդիմադիրների պնդումներին, թե Սամվել Բաբայանն ինքը պետք է հանձնաժողովում հարցերի պատասխանի, այլ ոչ թե հարցեր տա, վերջինս հակադարձում է՝ ընդդիմադիրները պետք է հարցերի պատասխանեն: Ըստ Բաբայանի՝ հանձնաժողով պետք է գա պատերազմի ժամանակ արդեն պաշտոնաթող նախագահի կարգավիճակ ունեցող Բակո Սահակյանը, քանի որ Փաշինյանը Արցախի ՊԲ հրամանատարին և ԳՇ պետին նրա առաջարկով է նշանակել: Բաբայանը հրավիրյալների ցանկում տեսնում է նաև շուրջ վեց տարի առաջ պաշտպանության նախարարի պաշտոնը թողած Սեյրան Օհանյանին:

Հանձնաժողովում հույս ունեն, որ Սամվել Բաբայանի ներկայությունը կնպաստի պատերազմի հանգամանքների բացահայտմանը:

Սամվել Բաբայանը, սակայն, Անդրանիկ Քոչարյանի հետ համամիտ չէ: Նա պնդում է՝ հանձնաժողովում խորհրդատուի կարգավիճակ չունի․ «Ես որպես փորձագետ չեմ, ես որպես արտախորհրդարանական ուժի ներկայացուցիչ եմ»։

Factor TV-ն ավելի վաղ հայտնել էր, որ վարչապետ Նիկոլ Փաշինյանի հետ արտախորհրդարանական ուժերի հանդիպման ժամանակ որոշվել է քննիչ հանձնաժողովի աշխատանքներին ապահովել Սամվել Բաբայանի, «Արդար Հայաստան» կուսակցության նախագահ Նորայր Նորիկյանի և «Ինքնիշխան Հայաստան» կուսակցության ղեկավար, ՊՎԾ նախկին պետ Դավիթ Սանասարյանի ներկայությունը:

Այսօր, սակայն, լրագրողների հետ զրույցում այդպես էլ չհիմնավորվեց, թե նրանք օրենսդրական ինչ կարգավորմամբ են մասնակցելու նիստերին, քանի որ Սահմանադրությունը նման հնարավորություն չի տալիս: Իշխող ՔՊ-ից քննիչ հանձնաժողովի անդամ Հայկ Սարգսյանը հայտարարում է, որ ԱԱԾ-ն նրանց գաղտնի և հույժ գաղտնի տեղեկություններին տնօրինելու իրավունք է տալու:

44-օրյա պատերազմում զոհվածների ծնողներից երկուսը ևս մշտապես մասնակցելու են նիստերին: Նրանք հույս ունեն, որ կբացահայտվի, թե իրենց զավակներն ում անգործության պատճառով են զոհվել:

Մանրամասները՝ տեսանյութում։

Նարեկ Կիրակոսյան