18.05.2026 | 18:20
Ոնց կարանք չվերադարձնենք, զբաղվող ա պետք․ Ծառուկյանը՝ Բաքվի գերիների մասին․ ՏԵՍԱՆՅՈՒԹ
Շիրակցի 62 գերիներից 32-ը վերադարձել է․ մարզպետ․ ՏԵՍԱՆՅՈՒԹ
Հասարակություն
21.02.2022 | 17:34
Շիրակի մարզպետ Նազելի Բաղդասարյանն այսօր իր պաշտոնավարման 100 օրվա հաշվետվությունը ներկայացրեց Շիրակի մարզի Արթիկ խոշորացված համայնքի Լեռնակերտ գյուղի մշակույթի տանը, որը վերանորոգվել է վերջերս սուբվենցիոն ծրագրով։ Պետական բյուջեից ծախսվել է 9 մլն 840.9 հազ դրամ, համայնքային բյուջեից՝ 10 մլն 923.1 հազար դրամ:
Նազելի Բաղդասարյանը նախ հայտնեց, որ ասուլիսի վայրի ընտրությունն ինքնանպատակ չէ, հարկավոր է ապակենտրոնացնել, իրադարձությունները դուրս բերել մարզկենտրոն Գյումրիից։ Ըստ նրա, այսուհետ որպես միջոցառումների և իրադարձությունների վայր կընտրվեն նաև մարզի մյուս համայնքները։
Մարզպետն իր ասուլիսում խոսեց Շիրակի մարզի մի շարք խնդիրներից՝ գյուղատնտեսությունից, թափառող շներից, ներդրումներից, սուբվենցիոն ծրագրերից։
Նա ասաց, որ Շիրակի մարզպետի պաշտոնը ստանձնելիս մտորումների մեջ էր՝ արդյո՞ք կկարողանար օրենսդիրից գործադիր տեղափոխումը սահուն իրականացնել, քանի որ իրեն մշտապես պատկերացրել է օրենսդիրր դաշտում։ Ըստ Նազելի Բաղադասարյանի՝ իր համար բավական բարդ շրջան էր․ կտրուկ անցումային գործընթացները զուգորդվեցին նաև ընտրությունների փուլով, հետընտրական զարգացումներով և մի շարք խնդիրներով, որոնք առանցքային են Շիրակի մարզում։«Խնդիրներ իրապես շատ ունենք, Շիրակի մարզը շարունակում է մնալ տնտեսապես ամենախոցելի մարզը՝ գործազրկության բարձր շեմով, բայց աղքատությունը և տնտեսական խնդիրները, որոնք առկա են մեր մարզում, ես վստահ եմ, որ հաղթահարելի են։
Այս կարճ ժամանակահատվածում գործընթացները, որոնց մեկնարկ են տվել, շարունակական պետք է լինեն։
Խոսելով մեր մարզի խնդիրների մասին՝ չեմ կարող չառանձնացնել մեկը՝ մեր մարզից գերեվարված տղաների խնդիրը։ Անկեղծ ասած իմ փոքրիկ ուշացումը, որի համար հայցում եմ ձեր ներողամտությունը, պայմանավորված էր նրանով, որ անգամ հարյուր օրվա ամփոփումից առաջ ես իմ պարտքը համարեցի մեկ անգամ լսել ծնողներին և նոր գալ ։
Գաղտնիք չեմ լինի բացահայտած, որ ամեն օր ժամը 12-ին հարազատները հավաքվում են Շիրակի մարզպետարանում։ Այս պահի դրությամբ հաստատված գերիների ցանկից 62-ից 32-ը վերադարձել է։
30-ը գտնվում է Ադրբեջանում, գործընթացները շարունակվում են։ Պետք է նշեմ, որ մեր հաստատված գերիների հետ հարազատները ունեն նամակագրական կապ, խոսակցական և երբեմն՝ տեսանյութերով, որոնք Կարմիր Խաչի միջազգային կոմիտեի միջոցով են իրականացվում, և մենք լիահույս ենք, ջանք ու եռանք չենք խնայում, որպեսզի օր առաջ տղաները վերադառնան տուն», – ասաց մարզպետը։
Նազելի Բաղդասարյանը մարզի խնդիրներից առաջնայինը համարեց գործազրկությունը։ Ըստ նրա, ամեն ինչ պիտի անել մարզը ներդրումների առումով գրավիչ դարձնելու համար։
Նա խոսեց նաև սուբվենցիոն ծրագրերից, տեղեկացրեց, որ Շիրակի մարզից 44 հայտ են ներկայացրել, որից 5-ը Գյումրի քաղաքից է, մնացած 39-ը գյուղական համայնքներից։
Արմիկ Մովսիսյան
Մանրամասները՝ տեսանյութում:
