24.03.2026 | 20:37
Արարատի մարզում գազալցակայանի գործունեություն է կասեցվել
Քոչարյանին սպառնում է մինչև 12 տարվա ազատազրկում․ գործով վկա է Վարդան Օսկանյանը․ ՏԵՍԱՆՅՈՒԹ
Քաղաքականություն
15.02.2022 | 21:15
ՀՀ երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի գործի քննությունն այսօր մտավ դատաքննության փուլ։ Գրեթե մեկ տարի պաշտպանական կողմը տարաբնույթ միջնորդություններ էր ներկայացնում և գործն այդպես էլ չէր հասնում մեղադրական եզրակացության հրապարակմանը։ Այսօր դատախազությունը վերջապես կարողացավ հրապարակել մեղադրական եզրակացության եզրափակիչ մասը։
Գործով առաջին անգամ ևս մեկ բարձրաստիճան պաշտոնյայի անուն շոշափվեց՝ ՀՀ նախկին ԱԳ նախարար Վարդան Օսկանյան։
Ըստ մեղադրական եզրակացության՝ գործարար Սիլվա Համբարձումյանն Օսկանյանից տեղեկացել է, որ պաշտոնյաներն ընդունել են կաշառքի առաջարկը։ Ընդ որում, պաշտոնյան հայտնել է, որ գումարը ստանալու համար նրանց անունից պետք է ներկայանա Քոչարյանի մտերիմ, գործարար Սամվել Մայրապետյանը։
Դատավոր Աննա Դանիբեկյանը պարզաբանեց՝ Քոչարյանին մեղսագրվող հոդվածը նախատեսում է պատասխանատվություն՝ առանձնապես խոշոր չափերով կաշառք ստանալու համար, որպես պատիժ նախատեսվում է ազատազրկում՝ 7-12 տարի ժամկետով՝ գույքի բռնագրավմամբ կամ առանց դրա։ Նախկին նախագահի համար, սակայն, մեղադրանքն անհասկանալի էր։
Չորս ժամ տևած դատական նիստում Ռոբերտ Քոչարյանը պարբերաբար հայտարարում էր, թե իր համար մեղադրանքի էությունը պարզ չէ։ Պաշտպանական կողմը միացավ իր վստահորդին՝ մեղադրանքը ոչ միայն պարզ չէ, այլև անհասկանալի է։
Ի նշան բողոքի՝ Ռոբերտ Քոչարյանի պաշտպաններ Հայկ Ալումյանը և Հովհաննես Խուդոյանը բոյկոտեցին նիստն ու հեռացան դահլիճից։ Դատարանը ևս հեռացավ, սակայն խորհրդակցական սենյակ՝ պաշտպանների նկատմամբ սանկցիա կիրառելու։ Դատական նիստը հետաձգվեց։
1998-2008 թվականներին ԱԳ նախարարի պաշտոնը զբաղեցրած Վարդան Օսկանյանը, փաստացի, ըստ մեղադրական եզրակացության, միջնորդի դեր է ունեցել Սիլվա Համբարձումյանի և բարձրաստիճան պաշտոնյանների միջև։ Գլխավոր դատախազի տեղակալ Գևորգ Բաղդասարյանը Factor TV-ի հարցին ի պատասխան՝ չցանկացավ մանրամասներ հրապարակել այն մասին, թե ինչպես ստացվեց, որ Օսկանյանի մասնակցությունը գործին միայն այսօր հանրայնացվեց։
Մինչդեռ, նախկին նախագահի պաշտպան Խուդոյանը որոշ մանրամասներ ներկայացրեց։ Նրա պնդմամբ՝ նախկին արտգործնախարարն իրականում հերքել է Սիլվա Համբարձումյանի ցուցմունքը։
Մինչ դատավարական կողմերը հակասական մեկնաբանություններ են տալիս Օսկանյանի մասով գործին ներգրավվելու մասով, Factor TV-ն փորձեց կապ հաստատել նախկին արտգործնախարարի հետ, սակայն մեր հեռախոսազանգերն անպատասխան մնացին։
Մանրամասները՝ տեսանյութում։
Ռոզա Վարդանյան
