29.06.2026 | 00:59
ԱԱ-2026. Վերջին վայրկյաններին հաղթական գոլ` փլեյ-օֆֆի մեկնարկային խաղում. ՏԵՍԱՆՅՈՒԹ
Ամերիկացի զինծառայողները չեն պատերազմելու Ուկրաինայում. Պենտագոն
13.02.2022 | 20:59
Ամերիկացի զինծառայողները չեն պատերազմելու Ուկրաինայում Ռուսաստանի ներխուժման դեպքում։ ТАСС-ի փոխանցմամբ՝ այս մասին MSNBC հեռուստաալիքի եթերում հայտարարել է Պենտագոնի մամուլի քարտուղար Ջոն Քիրբին։
«ԱՄՆ-ի նախագահ Ջո Բայդենը պարզ հասկացրել է, որ ամերիկացի զինծառայողները չեն պատերազմելու Ուկրաինայում»,- ընդգծել է նա:
Քիրբիի խոսքով՝ ԱՄՆ-ի զորքերի կիրառումը նույնիսկ ԱՄՆ-ի քաղաքացիներին երկրից տարհանելու համար «կբարձրացներ սխալ հաշվարկի ռիսկը և կավելացներ ռուսական և ամերիկյան զինված ուժերի բախման հավանականությունը», ինչը, Պենտագոնի մամուլի քարտուղարի կարծիքով, իրադրությունը «նոր մակարդակի կհասցներ»:
Քիրբին ընդգծել է, որ Ուկրաինայում ԱՄՆ-ի քաղաքացիներն ունեն առանց զինվորականների օգնության երկիրն ինքնուրույն լքելու հնարավորություն:
«Պետք է ոչ մի անհրաժեշտություն չլինի, որ զինվորականներն իրականացնեն ամերիկացիների տարհանումն Ուկրաինայից»:
Նա նշել է, որ Ուկրաինայի շուրջ հակամարտությունը դեռ կարող է կանխվել, սակայն քիչ ժամանակ կա։
«Մենք ընդունում ենք, որ ավելի ու ավելի քիչ ժամանակ է մնում, և դա մտահոգվելու առիթ է տալիս մեզ։ Սակայն մենք արդեն ասել ենք և մինչև հիմա հավատում ենք, որ դիվանագիտական ճանապարհի ժամանակը և տարածքը դեռևս մնում է։ Մենք դեռ կարծում ենք, որ կա ճանապարհ դեպի լարվածության թուլացում, ելք գտնել, որպեսզի կանխենք պատերազմն Ուկրաինայում»,- ասել է նա Fox News հեռուստաալիքին տված հարցազրույցում։
Քիրբին Մոսկվայում Գերմանիայի կանցլեր Օլաֆ Շոլցի հետ ՌԴ նախագահ Վլադիմիր Պուտինի առաջիկա բանակցությունների լույսի ներքո նաև նշել է Եվրոպայում ԱՄՆ դաշնակիցների ջանքերն Ուկրաինայի շուրջ իրադրության դիվանագիտական հանգուցալուծման ուղղությամբ:
