Ինչով է հայտնի «Գոլդեն Փելես»-ի նոր սեփականատերը. պետությունը վաճառեց «սև փողերով» կառուցված հյուրանոցը. ՏԵՍԱՆՅՈւԹ

Երեք  տարվա փնտրտուքից  հետո պետությունը վերջապես կարողացավ ինքնարժեքից ցածր գնով՝ 5 միլիարդ դրամով  վաճառել Մաքսային պետական կոմիտեի նախկին նախագահ Արմեն Ավետիսյանի ընտանիքից նվեր ստացած Ծաղկաձորի «Գոլդեն փելիս» հյուրանոցը:   Գնորդը 2002 թվականին հիմնադրված «Պրոյեկտ ինտեր-ինվեստ» ՍՊԸ-ն է, որը 2018 թվականի հեղափոխությունից հետո ամբողջությամբ պատկանում է  34-ամյա Նարեկ Նալբանդյանին: Շքեղ հյուրանոցի երիտասարդ սեփականատերն, ըստ ընտրողների ռեգիստրի, Կոտայքի մարզի Արգել գյուղից է: Ընկերությունը  ևս գրանցված է այս բնակավայրում:

«Գոլդեն փելիս» հյուրանոցը գնած «Պրոյեկտ ինտեր-ինվեստ» ՍՊԸ-ն մինչ այս երբևէ չի զբաղվել հյուրանոցային բիզնեսով: Պետական եկամուտների կոմիտեի կայքի տվյալներով  ընկերությունը զբաղվում է շինանյութի մեծածախ առևտրով: Շինանյութի առքուվաճառքից զատ ընկերությունը զբաղվում է նաև այլ ապրանքերի արտադրրությամբ և վաճառքով:

«Պրոյեկտ ինտեր-ինվեստ» ՍՊԸ-ի պաշտոնական կայքից տեղեկանում ենք, որ Նարեկ Նալբանդյանը բավականին տպավորիչ ծավալների բիզնեսներ ունի:  Ընկերությունը իրականացնում է միջազգային բեռնափոխադրումներ՝ 200 սեփական բեռնատարներով, ունի նաև բեռնատարների սպասարկման կենտրոն: զբաղվում է ալյուրի արտադրությամբ՝  Մասիսում և Արտաշատում, ձվի արտադրությամբ՝ Բայանդուր համայնքում:

 ԹԻՀԿ ծրագրերի համակարգող Վարուժան Հոկտանյանի համար խիստ զարմանալի է, որ թանկարժեք հյուրանոցը պետությունը վաճառվել է այս բիզնեսում փորձ չունեցող ընկերությանը:

Իսկ ահա այս հյուրանոցի արժեքը երիտասարդ գործարարը կվճարի առաջիկա հինգ տարիների ընթացքում: Առաջին վճարումը՝ 250 մլն դրամը վճարելու է մեկ ամսվա ընթացքում, իսկ մնացած գումարը պետությանը փոխանցելու է ըստ կազմած ժամանակացույցի՝ մինչև 2026 թվականի հուլիսի մեկը: Նալբանդյանը հանձն է առել առաջիկա հինգ տարիների ընթացքում 4,5 մլրդ դրամի ներդրում անել հյուրանոցում:

Թե ինչու Ավետիսյանները Ծաղկաձորում գտնվող 19 758 քառ. մետր մակերեսով շենք-շինությունները, դրանցում առկա գույքը, հյուրանոցի սպասարկման համար հատկացված 1.38 հեկտար մակերեսով հողամասը որոշեցին նվիրել պետությանը, մինչ օրս անհայտ է։ 

Մանրամասները՝ տեսանյութում։

Նարեկ Կիրակոսյան