Ճապոնիայի ԱԳՆ-ն կոչ է արել հայրենակիցներին լքել Ուկրաինայի տարածքը

Ճապոնիայի արտաքին գործերի նախարարությունը որոշել է առավելագույն` չորրորդ աստիճանի հասցնել Ուկրաինայի տարածքում գտնվելու սպառնալիքի մակարդակը և կոչ է անում իր քաղաքացիներին անհապաղ լքել այս երկրի տարածքը։ Այս մասին այսօր հայտարարել է Ճապոնիայի ԱԳՆ-ն, գրում է ՏԱՍՍ-ը։

Կոնկրետ երկրի տարածքում գտնվելու վտանգի չորրորդ աստիճանը, ըստ Ճապոնիայի ԱԳՆ-ի դասակարգման, պարունակում է պետության տարածքը անհապաղ լքելու և դեպի այդ երկիր ցանկացած ուղևորությունից հրաժարվելու կոչ։ Ճապոնիայի ԱԳՆ-ն իր որոշումը բացատրել է «ուկրաինա-ռուսական սահմանին լարվածության շարունակական աճով»։ Երկրի ԱԳՆ-ն ընդգծել է, որ իրավիճակի հետագա զարգացումը մնում է «անկանխատեսելի՝ չնայած շարունակվող դիվանագիտական ջանքերին», որոնք ուղղված են ճգնաժամի կարգավորմանը։

Ճապոնիայի ԱԳՆ-ն նաեւ նշել է, որ «ապագայում չի բացառվում» Ճապոնիայի եւ Ուկրաինայի միջեւ առեւտրային թռիչքների դադարեցումը՝ «կախված իրավիճակի զարգացումից»։ «Շատ երկրներ նույնպես արդեն խորհուրդ են տվել իրենց քաղաքացիներին լքել Ուկրաինայի տարածքը, դա կարող է հանգեցնել նրան, որ տոմսերի բացակայության պատճառով առևտրային ավիաընկերությունների կողմից երկրի տարածքից հեռանալը չափազանց դժվար կդառնա»,- հավելել է Ճապոնիայի ԱԳՆ-ն՝ Ճապոնիայի քաղաքացիներին կոչ անելով հնարավորինս շուտ լքել Ուկրաինան։

Տաթև Ֆռանգյան