06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
Պեկին-2022. դահուկորդ Միքայել Միքայելյանի արդյունքը՝ 15 կմ դասական ոճում
11.02.2022 | 17:53
Պեկինի 2022 թվականի ձմեռային օլիմպիական խաղերում այսօր պայքարի է դուրս եկել Հայաստանի բազմակի չեմպիոն, դահուկավազորդ Միքայել Միքայելյանը: Նա հանդես է եկել 15 կմ դասական ոճում և մրցատարածությունը հաղթահարել 43:09.1 ժամանակում: 95 մարզիկների պայքարում Միքայելյանը ելույթն ավարտել է 61-րդ տեղով. տեղեկացնում են ԿԳՄՍՆ-ից:
15 կմ դասական ոճում 37:54:8 արդյունքով օլիմպիական չեմպիոն է հռչակվել Ֆինլանդիայի ներկայացուցիչ Յիվո Նիսկանենը: Երկրորդ հորիզոնականը 38:18.0 արդյունքով զբաղեցրել է Ռուսաստանի օլիմպիական թիմի ներկայացուցիչ Ալեքսանդր Բոլշունովը, իսկ լավագույն եռյակը եզրափակել է նորվեգացի Յոհանես Կլեբոն՝ 38:32.3:
Միքայել Միքայելյանն օրերս հանդես էր եկել նաև օլիմպիական խաղերի սքիաթլոնում (15 կմ դասական ոճ+15 կմ ազատ ոճ) և զբաղեցրել 47-րդ տեղը:
23-ամյա դակուկավազորդը Հայաստանի բազմակի չեմպիոն է, միջազգային մրցաշարերի հաղթող և մրցանակակիր, մինչև 23 տարեկանների աշխարհի 2021 թ. առաջնությունում 30 երկրների 71 մասնակցի հետ պայքարում գրավել է 8-րդ տեղը՝ ցույց տալով Հայաստանի լավագույն արդյունքը դահուկավազքում:
Միքայելյանը երկրորդ անգամ էր մասնակցում օլիմպիական խաղերին. մինչ այս նա մեր երկիրը ներկայացրել է նաև Փհենչյան-2018-ում, որտեղ դահուկավազքի սպրինտում (դասական ոճ) 80 մարզիկների մեջ գրավել է 72-րդ, իսկ 15 կմ դասական ոճում՝ 83-րդ տեղը:
Հայ դահուկորդը 2016 թվականին մասնակցել է նաև Լիլեհամերի ձմեռային պատանեկան երկրորդ օլիմպիական խաղերին:
