21.08.2026 | 22:51
Մարմնամարզիկ Արթուր Ավետիսյանը՝ Եվրոպայի չեմպիոն
Ալիևը կրկին հիշել է «Զանգեզուրի միջանցքի» մասին ու ՀՀ տարածքով դեպի Նախիջևան էլեկտրահաղորդման գիծ կառուցելու ցանկություն հայտնել
Քաղաքականություն
11.02.2022 | 15:51
Ադրբեջանի նախագահ Իլհամ Ալիևը պետական «Ազերթաջ» լրատվական գործակալության հետ հարցազրույցում կրկին հիշել է «Զանգեզուրի միջանցքի» քարոզչական թեզը։ Ալիևը հիմա էլ ցանկանում է Հայաստանի տարածքով դեպի Նախիջևան նոր էլեկտրահաղորդման գիծ կառուցել։
«Հիմա մենք նախատեսում ենք Ադրբեջանից նոր գիծ կառուցել դեպի Նախիջևանի Ինքնավար Հանրապետություն «Զանգեզուրի միջանցքով», իսկ այնտեղից՝ Թուրքիա և Իրան»։ «Զանգեզուրի միջանցքը» ոչ միայն երկաթուղային, ավտոմոբիլային ճանապարհներն են, այն դերակատարում է ունենալու էներգառեսուրսների արտահանման գործում»,-ասել է Ալիևը՝ նշելով, որ «ունենալու են էներգամատակարարման նոր գիծ Նախիջևանի համար, այնտեղից էլ՝ Թուրքիայի տարածքով՝ Եվրոպա»։
Հիշեցնենք, որ պաշտոնական Երևանը բազմիցս է հայտարարել, որ ՀՀ սուվերեն ու ինքնիշխան տարածքով որևէ երրորդ երկրի միջանցք չի կարող անցնել։
Ի դեպ, ուշագրավ է նաև այն, որ չնայած Ալիևի միջանցքային հայտարարություններին՝ Ադրբեջանի մեծ եղբայր Թուրքիայի պաշտոնյաները վերջին շրջանում նախընտրում է քիչ խոսել այդ մասին։ Նախագահի ու ԱԳ նախարարի մակարդակով երկար ժամանակ է, ինչ «Զանգեզուրի միջանցք» քարոզչական թեզը չի հնչում։ Վերջերս էլ Թուրքիայի ԱԳ նախարար Մևլութ Չավուշօղլուն անդրադառնալով տարածաշրջանային ապաշրջափակմանը՝օգտագործել էր «Զանգեզուրի ծրագիր» տերմինը։
Էմմա Չոբանյան
