Բայդենը կոչ է արել ԱՄՆ քաղաքացիներին անհապաղ լքել Ուկրաինան

ԱՄՆ նախագահ Ջո Բայդենը Ուկրաինայում գտնվող ԱՄՆ քաղաքացիներին կոչ է արել անհապաղ լքել երկիրը՝ Ռուսաստանի հետ պատերազմի սպառնալիքի պատճառով։ «Ամերիկայի քաղաքացիները պետք է անհապաղ հեռանան»,- ասել է Բայդենը NBC-ին տված հարցազրույցում։

«Մենք գործ ունենք ոչ թե ահաբեկչական կազմակերպության, այլ աշխարհի ամենամեծ բանակներից մեկի հետ: Սա այլ իրավիճակ է, և ամեն ինչ կարող է արագ դուրս գալ վերահսկողությունից», – բացատրել է նա: Միաժամանակ, Բայդենը նշել է, որ եթե նույնիսկ պարզվի, որ Վլադիմիր Պուտինը «բավականին հիմար է ներխուժելու համար (Ուկրաինա), նա բավականաչափ խելացի է, որպեսզի չանի որևէ բան, որը կարող է բացասաբար անդրադառնալ ԱՄՆ քաղաքացիների վրա»։

Միացյալ Նահանգների նախագահն ընդգծել է, որ ոչ մի դեպքում պատրաստ չէ ամերիկացի զինվորականներ ուղարկել Ուկրաինա՝ ԱՄՆ քաղաքացիներին տարհանելու համար. «Եթե ամերիկացիներն ու ռուսները սկսեն կրակել միմյանց վրա, դա կլինի համաշխարհային պատերազմ»։

Վերջին ամիսներին Ռուսաստանի և արևմտյան երկրների հարաբերությունները շարունակում են լարված մնալ։ Արևմուտքը խոսում է Ուկրաինայի սահմանի մոտ ռուսական զորքերի կենտրոնացման եւ Ուկրաինա ռուսական ներխուժման սպառնալիքի մասին։ 2021 թվականի երկրորդ կեսին և 2022 թվականի սկզբին Ռուսաստանի Դաշնությունը ավելի քան 100 հազար զինվորական է տեղակայել բռնակցված Ղրիմում և Ուկրաինայի հետ սահմանին։ Կրեմլը հերքում է ռազմական ագրեսիայի ծրագրերը։

Տաթև Ֆռանգյան