26.04.2026 | 11:38
ԵԱ-ում մրցահարթակ դուրս կգան Տաթև Հակոբյանը և Վարազդատ Լալայանը
Վլադիմիր Պուտինն ու Սի Ցզինպինը համատեղ հայտարարություն են ընդունել
Քաղաքականություն
04.02.2022 | 14:11
Ռուսաստանը և Չինաստանը համատեղ հայտարարություն են ընդունել «նոր դարաշրջան մտնող միջազգային հարաբերությունների և գլոբալ կայուն զարգացման վերաբերյալ»։ Փաստաթուղթը հրապարակվել է Կրեմլի կայքում։
Մասնավորապես, նշվում է, որ Ռուսաստանը և Չինաստանը դեմ են առանձին պետությունների կողմից ժողովրդավարության հայեցակարգի կիրառմանը՝ այլ երկրների վրա ճնշում գործադրելու համար։
«Կողմերը վստահ են, որ ժողովրդավարության և մարդու իրավունքների պաշտպանությունը չպետք է օգտագործվի որպես այլ երկրների վրա ճնշում գործադրելու գործիք»,- ասվում է փաստաթղթում։
Նշվում է նաև, որ Չինաստանը ըմբռնումով է վերաբերվում և աջակցում է Ռուսաստանի կողմից Եվրոպայում անվտանգության երաշխիքների ձևավորման վերաբերյալ առաջարկներին։ Մոսկվան և Պեկինը նաև ընդգծել են, որ կողմ են համաշխարհային տերությունների միջև նոր տեսակի հարաբերությունների ձևավորմանը՝ հիմնված փոխադարձ հարգանքի, խաղաղ գոյակցության և փոխշահավետ համագործակցության վրա։
«Հաստատում ենք, որ ռուս-չինական միջպետական հարաբերությունների նոր տեսակը գերազանցում է Սառը պատերազմի ռազմաքաղաքական դաշինքներին»,- ասված է համատեղ հայտարարության մեջ։
Հիշեցնենք՝ Ռուսաստանի նախագահ Վլադիմիր Պուտինն այցով Պեկինում է։ Նա բանակցություններ է վարում Չինաստանի նախագահ Սի Ցզինպինի հետ։ Ռուսաստանի ղեկավարը որպես հյուր կմասնակցի նաև 24-րդ Ձմեռային օլիմպիական խաղերի բացման արարողությանը։
Տաթև Ֆռանգյան
