Ռոսկոմնադզորը լրատվամիջոցներից պահանջել է հեռացնել Նավալնիի հետաքննության մասին նյութերը

Ռոսկոմնադզորը տասնյակ անկախ լրատվամիջոցներից պահանջել է հեռացնել ընդդիմադիր գործիչ Ալեքսեյ Նավալնիի հակակոռուպցիոն հիմնադրամի (ФБК) հետաքննության մասին նյութերը։ DW-ի ռուսական ծառայության փոխանցմամբ՝ համապատասխան ծանուցումները փետրվարի 1-ին ստացել են, մասնավորապես, «Նովայա գազետա»-ի, «Մեդուզա»-ի, «Դոժդ»-ի խմբագրությունները, «Էխո Մոսկվի» ռադիոկայանը, «Զնակ» առցանց տեղեկատվական գործակալությունը, «The Village», «Բումագա» և այլ լրատվամիջոցներ։

Ընդհանուր առմամբ, Ռոսկոմնադզորը պահանջում է հեռացնել ФБК -ի 77 նյութեր, այդ թվում՝ «Նա քեզ համար Դիմոն չէ» հետաքննությունը, հրապարակումները Գելենջիկի մոտ գտնվող «Պուտինի պալատի», Թաթարստանի ղեկավար Ռուստամ Միննիխանովի անշարժ գույքի, Ռոսկոսմոսի ղեկավար Դմիտրի Ռոգոզոնի ամառանոցների և այլ ռուս պաշտոնյաների ու նրանց ընտանիքների անդամների ունեցվածքների մասին:

Որպես պահանջի հիմնավորում Ռոսկոմնադզորը բերում է 2022 թվականի հունվարի 28-ի գլխավոր դատախազության նամակը, որում ասվում է, որ այդ հրապարակումներում «տարածվում են կազմակերպությունների տեղեկություններ, որոնց գործունեությունն արգելված է ծայրահեղականության դեմ հակազդման օրենքով»։

DW-ի ռուսական ծառայությունը նշում է, որ սա առաջին դեպքը չէ, երբ Ռոսկոմնադզորը ԶԼՄ-ներից պահանջում է հրապարակումներ ջնջել։ 2021 թվականի դեկտեմբերին մի շարք ռուսական լրտավականներ նամակներ են ստացել, որոնցում պահանջում էին ջնջել այն նյութերը, որոնք հիմնված են «Պրոեկտ» հրատակչության հետաքննության վրա, որը հայտարարված է «անցանկալի կազմակերպություն»։